Hap ka liengsuiñ shipai ha 7 mer, mynsaw 2 ngut

Shillong, 21 Risaw:
Mynta ka step kawei ka liengsuiñ ki shipai khyndew kaba long ban shong briew tang ar ne lai ngut ka la hap ha 7 mer Upper Shillong bad ha katei ka jingjia 2 ngut ki shipai kiba don hapoh katei ka liengsuiñ ki la mynsaw. Kitei ki Ar ngut ki shipai bala mynsaw la tip kyrteng kum u Sukunara Pillai na Tri vandrum bad u Pradeep Singh na Haryana Katei ka jingjia ka la jia mynta ka step ha ka por 9:30 baje eiei. Katei ka liengsuiñ ka dei kaba dang shu mih na jaka sangeh helikoptar ki shipai Air Force na ALG 7 mer bad ka dang shu sdang ban kiew suki suki sha suiñ, hynrei haba la poi ha ka jaka kaba hap hapoh ka ophis u Assistant Director, Intensive Cattle Development Project A.H Veterinary Department, Upper Shillong ka tnad dieng ka la woh ia katei ka liengsuiñ bad ka la shad tawiar bad hap ha madan.Ki briew kiba don ha katei ka jaka kiba la sakhi ia katei ka jingjia ki la ong ba ha ka por mynstep kumba 8 baje eiei katei ka liengsuiñ ka dang her sha suiñ bad la ong ba ka wan na Bihar, hynrei ki shipai kiba shong hapoh jong ka ki don ha ka Training bad ba ki dang pyrshang ruh na ka bynta ban pynphuh pynphieng ia ka tamasa ki shipai ka ban long shen ha nongbah Guwahati. Katei ka liengsuiñ ka dei kaba la ai kyrteng kum ka Flying Rabbits bad ka dei ka liengsuiñ kaba ki ju ong ka ALP-12.Ka la don ka jingkhanglad na ki bor shipai ban ring dur ne ban shon dur ia ki nongthohkhubor ia katei ka jingjia ha ka por ba kiba mynsaw ki dang don hapoh , hynrei hadien ba la dep ban ia kren ki la shah pat ban shon dur bad ring dur tang ia ka dur ka liengsuiñ kaba la hap ha madan. Ia ki 2 ngut ki shipai kiba la mynsaw la pynkit noh wut wut sha Military Hospital, Shillong hynrei la ong ba ka jingmynsaw ka dang long malu mala. Hadien katto katne por ba la jia katei ka jingjia ki pulit ruh ki la poi sha katei ka jaka ban tohkit. Haduh mynta ka tnad shipai kam pat lah ban pynthikna ia ka daw ka jinghap katei ka liengsuiñ ne ioh ka don ka jingthud ki tiar shapoh ba ka leit tyngkhuh ha u dieng bad hap ha khyndew.