Shillong: Ka Kynhun shad napoh ka them Ri Bhoi na ka Shnong Sumer, Damsite bad Umsning hadien ba ki la leit iashim bynta ha ka Indian National Hip Hop kaba la long hapoh Jylla Nagaland, k la ioh ruh ia ka kyrdan kaba ar bad mynta ki la shah jied pat ban leit iakhun pat ha ka lympung shad ka ban sa long ha ka nongbah Goa ka ban sa long ha ka 7 tarik, haduh ka 11 tarik u bnai Jymmang mynta u snem ha kaba ki nongshad bapawnam na kylleng ka ri India kin sa wan iashim bynta.
Kane ka kynhun shad na ka them Ribhoi ka ban sa mihkhmat ruh ia ka Jylla Meghalaya kan hap ban durut bha khnang ba lada ki jop ia kane ka lympung iakop kin iohlad ban leit iakhun pat ia ka jingiakop ka ban sa long ha nongbah Mumbai bad shaduh Las Vigas jong ka ri USA hapoh ka international World Hip Hop.
U President ka All Meghalaya Dancers Association (AMDA) u Bah Kitbok Thabah, ha ka jingiakren bad u nongthoh khubor u la ong, “Ngi la pynkhreh naduh u Snem 2018 ban leit iakhun ia kane ka jingiakop shad Indian Hip Hop hynrei da ka jingbym don lad ha ka jinglut jingsep kaba la heh palat kumta kane ka kynhun kam shym la ioh lad shuh ban leit iashim bynta ha utei u snem 2018 hynrei ki la shim pat da ka lad ha u snem 2019”.
Katkum ka jingiathuh jong u Samla Shaibor Wansai sha ki dkhot nongialam ka All Meghalaya Dancers Association, kane kane ka kynhun shad ba la tip kyrteng ruh kum ka Wansai Fusion ka dei ruh ka kynhun kaba la pawkhmat bha ha ka Jylla ha kaba la jop ruh ha kiba bun ki rynsan iakop shad kiba heh kiba kynthup kum ka ‘Life Wire For Peace Ri Bhoi Got Talent’ bad mynta kane ka kynhun kan hap ban iakhun ruh ia ka Meghlaya Superstar Season 3 ha ka 4 tarik u bnai ban sa wan.
Kum ban shu kdew hangne, la Seng ia ka Wanshai Fusion ha u Snem 2014.
Na ka liang u President ka AMDA u la kyrpad khamtam eh ia ki nongmihkhmat bad ia ki paidbah jong ka them Ri-Bhoi baroh kawei ban ai lem ka kti ka mon ka kti kadiang na ka bynta ban noh synniang bad kyntu ruh ia ka ophis u Deputy Commissioner kumjuh ia ka tnat Art and Culture jong ka Sorkar Jylla ban theh jingiarap sha kane ka kynhun ka ban sa leit iakhun shen ha une u bnai ban wan.
Ia u Amit paul ngi la duh thiah duhdem, to ngin ia mih mynta ban iarap ia ki ruh, to u Blei un kyrkhu iaphi kiba kloi ban iarap lem iaki ba donkam jingiarap, kumba u Blei u la ai ka sap iaphi wat pynlehnoei iaka ne sngew khyllew ioh u shim noh.