AIS SUJA
Hangno u Blei u shong? Ka long ka jingkylli kiba bun bah ki briew ha kane ka pyrthei naduh uba biej haduh u bas tad bad haduh u riewstad saian (Scientist). Baroh ki briew ki ngeit u don u Blei u Nongthaw Nongpyllong, ka daw ka long ba uta u Mynsiem u Blei hi u pynsngew (feeling) ha ki ne kata ka jingtiplem jongki (Conscience) ne kata ka jingmaian (intuition), dei namar ba ki briew ki long ki jingthaw jong u Blei. Hynrei la katta ruh ki mutdur ia uta u Blei uba kum kano ka dur jong u lane hangno u don bad hangno u shong? Kadaw ka long dei namar ba u briew um lah ban iohi ne peit ia u Blei da kine ki khmat ba kynjadoh (naked eyes).
Hynrei ka ktien u Blei (Bible) ka don ban iathuh hangi shaphang u Blei bad hangno u shong!. Ka ktien u Blei ne ka Bible ka ong kumne – “….. U Trai, ka khet jong u ka ha bneng”. Salm 11:4. U Blei u kren ruh dalade- “Ka bneng ka long ka khet jong nga, ka khyndew ka jingiuh kjat jong nga. Isaiah 66:1. U Job u ong – “Ha khmih u Blei u long uba khraw bad ngim ithuh ia u (kaba mut ngim lah ban iohi ia u da kine ki khmat), Job 36:26. Haba u briew umlah ban iohi ia u Blei, u briew u shumutdur ia u Blei ba u long uba kumno? Dei na kata ka daw ki briew ki mane thala ia u Blei.
Ha ka kitab u Isaiah la ong – “Badno te phin pynsyriem ia u Blei? Bad ka dur aiu phin ia nujor ia u?. Nangta u Blei u kylli – Badno te phin pyniasyriem ia nga? Ong uta u Bakhuid. Phi kwah ban tip kum uno u Blei? “To khmied ia ki khmat sha jrong to khmih uei uba la thaw ia kine? Isaiah 40:12-26. U Blei uba la thaw ia ki bneng uba la thaw ia ki met bneng ba phyla u don sha jngai bah na kine kein. Um shym shong ha haw haw (space) lane ha ki met bneng (planets) lane hangno hangno kumba mutdur mano mano. U Blei u dei u Nongthaw Nongpyllong kumta u la thaw kyrpang ia la ka jaka shongneh ia kaba ki briew da ka jingstad jong ki kim lah ban poi shata. U Blei u long uba khraw.
Ka ktien jong u Blei hi ka iathuh shai kdar ha ngi ka ong – “Ngi don ka jingtei na u Blei (da u Blei), ka ing ba la thaw ym da ki kti- ka bymjukut ha bneng, 2 Korinth 5:1. Kaba mut ba u Blei u don hakata ka ing bneng ka bym shym la thaw da ki kti briew, hynrei dei ka kti u Blei kein. Ka jaka shong u Blei’ ka long kata kein kaei kaei ka bym iohi, kata ka bymiohi ka long bymjukut kein. 2 Korinth 4:18. Ka jaka ka shong u Blei kadei ka Bneng kaba Lai (Third heaven). 2 korinth 12:2. Kaba mut jngai bah na kane ka pyrthei ne na kiwei pat ki met bneng. Ka jaka shong u Blei ka long ka bymjukut ka lawei (Eternity of Future) dei ia kata kein kaba u Apostol Paul u ong – “kiei kiei ruh ba ka khmat kam shym la iohi bad ka shkor kam shym la ioh sngew bad kim shym la mih ruh ha ka dohnud u briew, ki long kita kein kiei kiei ia kiba u Blei u la buh lypa ia kita kiba ieit ia u. 1 Korinth 2:9. Dei hangne kein u Blei u don bad u ap ia kita kiba ieit ia u.
U Blei um dei u briew. Ki lynti jong u ki jrong ban ia ki lynti ki briew, ka iapher naduh mihngi haduh sepngi. Dei na kata ka daw ki riew stad saian bun ki la pyrshang ban wad ia uta u Blei hangno u don ne u shong hynrei long lehnohei, haba tang ia ki met bneng kim pat poi lut, kumno kin wad sa ia u Blei ? Bad haba kim shem kim lah ban pynshisha (proof) na kata ka daw bun ki ong – ymdon u Blei. Hynrei u Blei u ong – “ki Biej ki ong – ymdon u Blei Salm 14:1. Kaba mut ka jingstad ka pyrthei ka long ka jing I biej ha u Blei. 1 Korinth 3:19. U briew u wad ia u Blei. Hynrei u Blei pat u jngoh arsut na bneng ia ki khun bynriew ban khmih don ne em mano mano ba shemphang ba la wad ia u Blei. Salm 14:2.
Ymdon ba iohi ia u Blei mynno mynno ruh; lada ngi iaieit paralok, bad ia kata ka jingieit jong u la pynjanai noh ha ngi. Ioanis 4:12. Hynrei ki ban iohi ia u Blei ha kata ka jaka ba u don, dei tang kiba khuid ha ka dohnud. “Suk kiba khuid ha ka dohnud na ba kin iohi ia u Blei. Mathaios 5:8.
Phi don ban ong eiei?