Halor kiba ioh pang khlam corona, ia bakla jingkhein ka sorkar bad ki BSF

Shillong: Ha ka jing ia khun pyrshah ia ka khlam COVID19 ha Meghalaya, ka la poi sa ka jing ia bakla khein jingkhein, hapdeng ki shipai BSF bad ka jingkhein jong ka sorkar Meghalaya.

Ka sorkar Meghalaya, ka iathuh ba ki BSF, kiba ioh pang, ki dei 5 ngut, katba ki BSF, lyngba ka Meghalaya Frontier, ka iathuh ba ki don 11 ngut ki shipai BSF, kiba ioh ia katei ka jingpang.

“Haduh mynta, ki don 11 ngut ki shipai BSF, ha kaba uwei ula mih noh na ka jaka sumar, 4 ngut ki don ha jaka sah kyrpang, hadien ba kitei ruh ki la mih na ka jingshah sumar” ong U UK Nayal, u nong ai khubor jong ki shipai BSF.

Ki BSF ha ka Jylla, ki don mynta ia 25 tylli ki jaka shong kyrpang, ha kaba ki don 1,561 ngut ki shipai kiba shong kyrpang bad ki don mynta sa 1,033 ngut kiba dang song kyrpang ha ki jaka bapher.