Halor ki khar die madan: Dawa ka longkmie, ba dei ban weng noh ia ka jingshah dain kuna ba T.5,000, kyntait ka Kashari

Shillong: Mynta ka sngi, ka Meghalaya High Court, ka la shim bishar halor ka jing ujor jong ka kong Julie Warjri, na Sunny Hills, ha kaba ka dawa na ka kashari, ba ka dei ban weng noh ia ka jing dain kuna kaba mar T.5,000 ia ki hynniew ngut ki longkmie, kiba ujor pyrshah ia ka rai jong ka Khasi District Council, kaba khang ban die madan ia ki bar Jylla.

Ka rai jong ka High Court, ha ka 14tarik Risaw 2019, ka la rai ba kitei ki longkmie kiba ujor pyrshah ia ka rai jong ka District Council, ki dei ban shah dain kuna mar T.5,000 bad ba ki dei ban leit siew ia katei ka kuna hapoh ar taiew sha ophis jong ka Khasi District Council lane kaba dei ban long ha shwa ka 28tarik Risaw 2019.
Hadien ka jing ia said na arliang mamla, u nongbishar jong ka kong Warjri, U P Yobin, ula pan bor na ka kashari, ba un weng noh ia katei ka jing mudui jongu lane ka review petition mynta ka sngi; hynrei hadien ka jing ia said lang na ki riewsaid kiba don na ka liang ka sorkar Jylla bad kumjuh na ka liang ka District Council, u Chief Justice ka Meghalaya High Court, ula pynkut noh ia katei ka mukotduma.
Kham mynshwa, lah ban pynkynmaw ba kitei ki hynniew ngut, ki leit mudui sha High Court, ban pyrshah ia ka rai jong ka Khasi District Council, kaba khang die madan ia ki bar Jylla, kaba la pynmih ha ka 4tarik Risaw 2019.
Kito kiba leit ujor sha kashari ha ka sien ba ladep, ki long ka kong Julie Warjri na Sunny Hills, kong Theila Marbaniang na Mawlai Mawdatbaki, kong Banisha Jyrwa, na Mawprem, Kong Idaris Kharwanlang na Mawbah, Kong Deneris Thongni na Mawkhar, kong Risuklang Marwein na Shyiap, kong Margrete Khongwir na Bishnupur.