Halor u COVID-19, lum u MLA Jirang, ia ki heh ka koit ka khiah, Pulit bad Nongialam shnong ka thain Byrnihat

Nongpoh: U Bah Sosthenes Sohtun, MLA ka Jirang Constituency, hynne ka sngi u la lumlang ia ki briew ka koit ka khiah, ki heh pulit ka Ri Bhoi bad ia ki nongialam shnong jong 12 tylli ki shnong ha ka thain Byrnihat, kata na ka bynta ban iakren halor shibun ki mat kiba iadei bad ka jingpang COVID-19.

Ha katei ka jingialang, nalor u MLA, la donlang u Dr. M. Mawrie, DMHO, nangta u Bah P. Syiem, ASP ka Ri Bhoi, u Bah Victor Rani, MDC Jirang lem bad shibun ki nongialam shnong ka thian Byrnihat, ha kaba lyngba katei ka jingialang, ki la ioh ban iakren halor shibun ki mat kiba iadei bad ka khlam COVID-19, la ka long halor ki lad ki lynti ban iada ia ka jingsaphriang jong ka bad khamtam eh halor ka jingpynshai haba iadei bad kumno ban leit ontep ia kito kiba khlad na ka jingpang COVID-19.

Lyngba katei ka jingialang, ki rangbah shnong ha ka thian Byrnihat, ki la buh shibun ki jingkylli ia u Dr. M. Mawrie, bad na ki jingkylli kaba ki buh ki iadei bad kum ban leh haba leit ontep ia kito ki briew, kiba la khlad noh ha ka jingshah ktah ha u jingpang COVID-19.

Haba jubab ia ka jingkylli ia ka jingkylli na kitei ki nongialam shnong katei ka thain, khamtam eh haba iadei bad ka jingleit ontep ia kito kiba khlad ha u Halor ka u COVID-19, u DMHO ka Ri Bhoi, u la pynshai sha kitei ki nongialam shnong ba kim dei ban tieng eh, namar u/ka briew ba la iap, kim lah shuh ban pynsaphriang ia ka jingpang, hynrei watla katta ki dei ban phikir ialade, kata ka long ba kim dei ban leh shngain, hynrei ki dei ban deng ia ki jingda khmut (Mask) bad kumjuh ruh ia ki Gloves ne ki jingda kti, khnang ba kan iada na kino kino ki jingshah ktah.

Katba na ka liang u Bah Sosthenes Sohtun, u la ong ba ka nongrim kaba la pynlong ia u ba un lum ia ki heh ka koit ka khiah, ki Pulit bad ia ki nongialam shnong, ka long ba ki nongialam shnong jong katei ka thain kin ioh jingpynshai halor ban shim ia ki lad ki lynti ban iada na ka khlam COVID-19, bad ha kajuh ruh ba kumno kin shim ia ki lad ki lynti haba don kino kino kio briew kiba khlad na ka jingpang COVID-19.

U Bah Sosthenes Sohtun, u la kyntu ia ki paidbah nongshong ka thain Byrnihat lem bad ia kiwei de ki thain ha ri Bhoi, ba ki dei ban bud ryntih ia ki jingbthah da ki briew ka koit ka khiah bad sorkar jylla, khnang ba kan iada na ka jingsaphriang stet ka khlam COVID-19.