Nongpoh: Halor ka jingeh ban ioh Schedule Tribe Certificate, kaba la iakynduh da ki khun na ki kynthei bar jylla, kiba la wanrah da ki Rang Khasi na kiwei ki jaka bad ban shonglok ia ki, hynnin ka sngi u Bah Balajied Rani, MDC ka Nongpoh, u la lum jingialang ia baroh ki Nongialam Hima, Raid bad shnong kiba hap hapoh ka Nongpoh Constituency, na ka bynta ban iatir iathai halor katei ka jingeh.
Ka nongrim kaba la pynlong ia u MDC ka Nongpoh ban lumlang ia ki kitei ki khlieh nongsynshar, ka dei hadien ba ki la ioh ia shibun ki jingujor halor ka jingeh da kitei ki Khun na ki Thei bar jylla ban ioh ia ka Schedule Tribe, namar kat haduh mynta, kiba kum kitei ki khun na ki Thei bar jylla kaba la wanrah da ki Rang Khai, ki dang shem jingeh ban ioh ia ki Schedule Tribe Certificate, kata ka dei namar ba ia katei ka rukom wanrah Kynthei na shabar jylla, kaba la tip kum ka ‘Shaw Bhoi’ lane ‘Ring bia’ bad ‘Lam Bhoi’ kam pat rung ha ki riti dustur u Khasi, kaba iadei ruh katkum Khasi Custom of Lineage Act, 1997.
Ha katei ka jingialang, nalor ka jingdon u MDC, la sakhi ruh da ka jingdon u Paiem Wanphrang Syiem, Sirdar ka Nongpoh Elaka Sirdarship, nangta ki Lyngdoh, Longsan Mansan lem bad ki rangbah shnong bapher bapher kiba hap hapoh ka Nongpoh Constituency, kiba la iatai jur halor ka jingbymlah ban pynrung katei ka riti ka dustur ki Bhoi hapoh ka Khasi Social Custom of Lineage Act, 1997.
Haba iadei bad katei ka jinglum ia ki nongsynshar shnong, u Bah Balajied Rani bad u Paiem Wanphrang Syiem, ki la pynpaw ba ki sngewkhia eh halor ka jingbym iohrung katei ka riti dustur bad ka kam shongkha shongman ki Bhoi hapoh ka Khasi Social Custom of Lineage Act, namar ia katei ka rukom ban leit shaw Kynthei na shabar jylla da ki Bhoi, la leh naduh ki por u barim bajah, hynrei namar ka jingbym iohrung katei ka Riti shongkha shongman hapoh ka Khasi Social Custom of Lineage Act, ka la ktah shibun eh na ka bynta kito ki khun kiba mih na u kpa Bhoi bad ka Kynthei nabar jylla.
Ki la pynpaw ruh, da kaba ong, ba tang namar ba katei ka riti ka Dustur ki Bhoi kam rung ha ka Khasi Social Custom Lineage Act, 1997, ki la don shibun ki khun ba shu Ring Bia ne Shaw Bhoi, ki shem jingeh ban ioh ia ka jinglong ithuh kum ki Khasi paka bad ki eh wat ban ioh i aka Schedule Tribe bad kata ka jia long tang namar ba ia katei ka Riti Dustur, kam pat rung hapoh ka Khasi Social Custom of Lineage Act.
Lyngba katei ka jingiakynduhlang hapdeng ki Nongsynshar shnong, u MDC bad Paiem ka Nongpoh Elaka Sirdarship, ki la shim ia ka rai ban dawa na ka KHADC, ba ka dei ban pynmih noh lyngba ka Executive Order bad ban bsuh ia ki ki kyndon ain ba thymmai hapoh katei ka Khasi Social Custom of Lineage Act, khnang ba kan long kum ka jingailad ia kito ki khun Bhoi ba kin ioh da kaba suk khlem da pynjynjar na ka bynta ban ioh ia ki Schedule Tribe Certificate, namar kiba kum kitei ki khun kiba ka Kmie ka dei ka bar jylla, hynrei u Kpa pat u dei u Bhoi paka, ki dei hok ban ioh ia ka Schedule Tribe, namar ia katei ka Riti Dustur la leh naduh ki por ba mynshwa.
Namar katei ka jingialynduhlang, ngi la shim ia ka rai ba shen ngin sa leit ban kynduh ia u CEM ka KHADC, na ka bynta ban dawa pynrung noh ia ka Lam Bhoi ne Shaw Bhoi hapoh ka Khasi Social Custom of Lineage Act bad ban bsuh noh ia katei ka Riti Dustur u Bhoi naduh mynbarim ba kan rung noh hapoh katei ka kyndon Ain Shongkha Shongman ka KHADC, khnang ba ki Bhoi kin ioh ia la ka jong ka hok bad ruh ban pynneh iala ka jong ka Riti Dustur u mynbarim, ki la bynrap.
Phi don ban ong eiei?