Halor “ka Shongkha u Khasi ha ka Niam Khristan”

Editor,
Nga la ioh ban pule ia ka jingthoh “Ka Shongkha Shongman U Khasi ha ka Niam Khristan” ba la thoh da u Ex-Rev. K. langrin. Kane ka jingthoh jong une u Pastor barim ka long kaba shongnongrim bad kaba dei. La jar katta ruh nga shu kwah ban ban jur halor kine harum:

1. Ba ka long kaba shisha ba ki Balang Khristan mynshuwa ha khynriam bad synteng ki la iakop bad iabein para maki ba ka Niam Khristan(Balang) jong ki ka long kaba shisha namar la seng da U Jisu Khrist bad ki don ki lad jingpynim. Ha ki shnong ba la poi nyngkong kawei ka Balang Khristan kita ki shnong kim shah shuh ia kiwei ki Balang Khristan ban rung ha shnong bad Kim shah ia ki Khun shnong ban iapoikha bad ki sohniam ne ban iapoi kha bad kiba dang sah ha ka Niam Khasi, namar ki ju niew ba kiba dang don ha ka Niam jong ki Jentil ki bym ngeit ne mane ia U Jisukhrist. Kane ka la wanrah ia u symbai jong ka jingiapait para Khasi ne ka bih jong ka jingiashun iapait para jaitbynriew. Wat haduh kine ki sngi ruh Kane ka sni ka dang don malu mala hynrei kam da longdoh longsnam shuh. Nga kyntu jur ia ki para khasi kat shaba ki don, ban bret noh ia kane ka bih bad ban ym biahphongrai shuh namar kane ka pynjot ia ka jaitbynriew kaba la shnong synjor hakhmat ka umsaw jong kiwei pat ki jaitbynriew kiba la jyllei lypa namar khlem jingker bad kiba la knieh ia ka khyndew bad ka meimariang jong ngi, kiba la bat lakam ia ki lad kamai kajih bad kiba la pynjngut ia ka snam khasi da ka snam jong ki kada khlaw hajan man la ki kyntoit jong ka Ri Khasi bad Ri Achik.
2. Ka tynrai bah jong ka Niam Khristan ka long ban ieid, niewkor bad burom ia kiwei kumba ieid, niewkor bad burom ialade. U Jisu ruh u la ai ka hukum ban ieid ia la u Paramarjan kumba ieid ialade. Kiba leh mar pyrshah ia kane lane niewpoh ia kiwei, kim dei ki Khristan wat la ki kam kumta ialade. Ki Presbyterian kiba bein ne isih ia ki Katholik, ki ba dei na ka Balang u Blei, ki Fellowdhip, ki Balang u Khrist ne kiwei kiwei kum ki Balang Baptist kim dei kiba bud ia u Jisu hynrei kiba shah ha ka jingialam jong u Mynsiem Bymman lane u Ksuid. Kumjuh ruh ka long kumta ia ki Katholik, ki Balang u Blei bad kiwei kiwei kiba dei na kiwei ki Balang (Niam). Ka long kumba la kynnoh mano re, ” Khristan ka kam, Soitan ka kam”. Kine ki jait kam ki mih na ki riewdum ( these are the products of uncivilized people). Ki Khristan ki dei ki Khun jong ka jingshai kumba u Jisu Khrist u dei Ka Thymmei jong ka jingshai.
3. Shaphang ka Shongkha shongman u khasi ha ka Niam khristan pat, nga kwah ban kdew hangne, ba kam dei ka kam Khun jakai. Ka dei ka kam kyntang, ka dei ka Sakrament, ka dei ka Jubanlak ba la khlei da ki arngut shitnga, ka dei ka jingiateh jutang jong ki arngut ban iaieid markylliang, ban ialong shitnga haduh ka sngi jingiap, lada duk ne riewspah, lada kyrduh ne pahuh, lada koit ne pang bad la shim ia kane ka jingsmai hakhmat u Blei Nongbuh nongthaw, bad la sakhi ia kane da u nongpyniathoh, da ki sakhi, da ki kmie ki kpa, da ki arliang kur arliang jait bad da ki riew dkhot jong ka Balang bad ki Lok ki jor kiba don ryngkat, kiba ai jingkyrkhu kyrdoh ban iaroi parum pareh bad ka duwai ka phirat lem bad ka jingkitbok ba kin iaim shongprah shongshang haduh ban poi ha dwar u Nongbuh Nongthaw. Ka Shongkha kam dei satia kata ka jingiapylliat sansyieng noh kumba la kynthoh ha ka jingthoh ba lah ban iakhlad noh da ka ba leit baroh arliang mamla sha ka iingshari jong ka District Council.

Na u Bah Philip Marwein,

Shillong-2.