Halor ka roster, jinglip ding bad Khanduli, yn iakren ka UDP ia U MR

Shillong:Ka Core committee jong ka parti UDP, ka la iakynduh ha ka 12 tarik jymmang 2023, ban iatai iathir haba iadei bad ki mat jong ka Roster system bad ka Reservation policy ha ka jylla.

Ka jingialang ka la iakren bad iatai ruh ia ka jing shah thombor bad ban beiñ jong ki paidbah nong shong shnong kiba don ha ki khappud jong ka jylla Assam, kaba dang shu jia shen ha shnong Khanduli.

Ha ka jingialang la ioh ruh ban iakren haba iadei bad ka jingiakynduh jingeh jong ka jylla na ka jingduna jong ka bording elektrik bad ka jing pynlip ding, kaba la ktah ia ka jylla baroh kawei.

Na ka liang jong ka komiti, ka la rai ba kine ki jingioh bad kiba sngewkhia yn sa rah sha u myntri rangbah jong ka jylla, hadien ba u la wanphai sha ka nongbah jong ka jylla bad ka jing iakynduh ia u myntri rangbah haba iadei bad kine ki mat kan long kloi katba lah.