Halor ka ring um rep, khot jingialang ka Planning Board

Shillong, 3 Rymphang:
Ka Meghalaya State Planning Board – Working Group -5 ka la iakynduh mynta ka sngi, ha Yojana Bhavan, Main Secretariat, Shillong ban ia kren halor ka jingai um rep bad khamtam halor ka jingtrei jong ki scheme ring um bapher bapher.
Katei ka jingialang, la pyniaid da u Bah John F Kharshiing, Co-Chairman, MSPB, ha ka jingiadon lang u Mr Grithalson Arengh, Dy Chairman, MSPB, bad la shem ha ki jingiakren ba kat kum ki kam ki scheme kiba la pyndep haduh u Lber 2013, ka Irrigation Potential kaba la plie lynti lyngba ka scheme hapoh ka jylla ka long baroh 41,449 Ha. (Hectares) katba ha kawei ka liang la pyntip ka tnad Water Resources ba katkum ki report kaba ki la ioh lum antad ka jylla Meghalaya ka don ka Irrigation potential haduh 2.1 Lakh Ha.(Hectare). Kumta katkum ka jingplie ki schemes haduh kine ki sngi ka Irrigation Potential kaba la thaw bad plie lynti ka long 19%.
Ki ophisar jong ka tnad Water Resources Department ki la ai ka Power Point halor ka ‘draft’ water policy kaba san kaba la pynkhreh da ka Water Resources Department. Ki ophisar jong kane ka tnad ki la pyntip ba ki la dep phah ia kane ka juh sha ki lai tylli ki Autonomous District Councils (ADCs) bad ki dang ap yn da dep ka election ban ia kynduh markhmat ia ki bor ADC ban ia kren bad ban ioh ia ki jingai jingmut halor kane ka policy kaba donkam bha.
U Co-Chairman, u la ai jingmut ia ka WR Department ban pynlong ka jingiakynduh bad ka NEHU (Geography) Department, IIT –Guwahati, MLCU, namar u la ioh jingtip ba ka skul bah NEHU ki la dep pynkhreh ia katto katne tylli ki report halor ki Um ki Wah kiba don hapoh kane ka jyllla kaba lah ban iarap ia ka tnad Water Resources Department.
U Bah John F Kharshiing, Co-Chairman, MSPB, u la ai jingmut ba ka State Planning Board ha ryngkat ka Water Resources Department, ba ki lah ban pynlong da ki jingai jingtip paidbah bad ha ka juh ka por ban ia kynduh lang kyrpang ia ki lai tylli ki Autonomous District Councils, ki Dorbar Shnong, Dorbar Raid bad Dorbar Hima (Traditional Institutions), ki NGOs / Civil Society, ban ia thir ia tai halor kane ka Draft Water Policy.
La ia kren ruh halor ka jingduna nongtrei ka tnad Water Resources Department bad halor ka lawei jong ki Muster Roll bad kiwei kiwei.
Ha kane ka jingialang na kiwei kiwei ki tnad kiba la ia shim bynta ki long ka Mrs HK Marak, Commissioner & Secretary, SPB, u Bah P Lyngwa, Chief Engineer, Water Resources Department, u Bah MM Sun, Secretary, PWD (R&B), ki Addl Chief Engineer bad kiwei kiwei kynthup ki officer jong ka State Planning Board.