![](https://www.urupang.com/wp-content/uploads/2024/07/image-77.png)
Shillong:Ka sorkar Meghalaya, ka ai khublei ia ka Nirmala Sitharaman, myntri pla pisa ka sorkar India, haba ka leit rah ia ka bhah kam mynta ka sngi, ha kaba ka plie lad ia ka ioh kam ioh jam bad ka jingplie ia ki sap ki phong bad halor ki saw tylli ki khmat bad kitei ki kynthup ia ka Garib (poor), Mahilayen (Women), Yuva (Youth) and Annadata (Farmer).
Ki mat kiba kongsan bha jong kane ka mang pisa, ki long ha kaba pynkhlain ia ka rep, ka jingiohkam iohjam bad ka jingsei ia ki sap ki phong, ka jingwad ia ka jingstad bad ka jingshemphang jong u briew, ka jingtrei karkhana, ka roi ka par ha ki jaka sor, ka jingbiang ka bor ding, ka jingdon ki jaka trei jaka ktah bad sa kiwei de kiba kynthup ia ka mang treikam jong ka Meghalaya, kaba don haduh shiphew tylli ki mat.
Ka sorkar jylla, ka ong shuh shuh, ba ka jingai jingiarap ia ki jylla, kaba ailad haduh 50 snem ban shim sut khlem da khein ram, kaba la kyntiew na ka T.1.3lak klur sha ka T.1.5lak klur, ka dei ka lad kaba myntoi bha ia ka Meghalaya bad la iathuh ba ka Meghalaya, ka la pyndonkam haduh T.1.300klur na kane ka shim.
Ka sorkar jylla, ka ai jingiaroh ruh ia ka rai jong ka sorkar India, halor ka jingai tulop kaba shibnai, na bynta kito kiba ioh T.15hajar bad ban khate ha ka laisien, ia ki nongtrei kiba dang shut rei thymmai bad la ong ba kane ka iahap bha bad ka Meghalaya Industrial and Investment Promotion Policy, 2024 ban kyntiew ia ka ioh ka kot ha ka jylla bad la ong shuh ba ka jingmang pisa kaba T.100klur ia ki MSME kan nang ai mynsiem ia ki samla kiba kwah ban seng kam lajong.
Ka sorkar jylla, ka ai jingiaroh ruh ia ka jingplie ia ki 100 tylli ki tnat jong ka Indian Posts and Payments Bank ha ka thain shatei lam mihngi bad kane kan iarap shibun ha ka kam kynshew pisa ha ka jylla bad la ong ba ka jylla, kan iai bteng ban plie shuh shuh sa shibun tylli kitei ki shnat ba thymmai. Ka sorkar jylla, ka ai jingiaroh ia ka jingbei pisa ba shisnem, na ka bynta ban shah hikai, ha kaba kiba shah hikai, kin ioh ia ka jingsiew kaba T.5hajar shibnai bad nangta sa ka jingai jingiarap kaba T.6000 kaba yn siew shisien bad nangta sa ka jingnang mang bun shuh shuh ia ki skhim shna iing, ka ban long ka jingmyntoi kaba khraw ia ka jylla, ong ka kyrwoh na u Joint Secretary, Finance (Budget), Government of Meghalaya.
Phi don ban ong eiei?