Halor ka lyer jaboh ha Byrnihat, dei ban kren bad ka Assam, ong ka KSU

Nongpoh:Haba iadei bad ka kaiphod kaba la pynmih da ka Central Pollution Control Board bad kaba la pynpaw ruh ba ka ba ka Byrnihat, Meghalaya, ka dei kawei na ki jaka sor hapoh ka Ri, kaba pyni ia ka jingjaboh ka lyer, kumta haba iadei bad katei ka jingjaboh ka Lyer ha Byrnihat, na ka liang ka KSU, North Khasi Hills District, lyngba u Samla Ferdynald Kharkamni, ki la dawa na ka sorkar jylla ba ka dei ban kren sha ka sorkar Assam, namar lehse ia ka Lyer jaboh ha Byrnihat, la pynmih pynban da ki karkhana, kiba don ha ka liang Assam.

U samla Ferdynald Kharkamni, u la ong ruh ba kumba ka long mynta, bun na ki Karkhana kiba khlain ka jingpynmih tdem jaboh, ki dei kiba don ha ka liang Assam, kata naduh Byrnihat ter ter haduh Jorabat, ha kaba ha katei ka liang Assam, la bun tang ki karkhana kiba pynmih tdem bad kiba palat eh ban haba ianujor bad ka jingpynmih tdem da ki Karkhana kiba don ha ka liang Meghalaya.

“Ka seng haba ka la iohi ia kata, ka sa pynmih ruh ia ka jingdawa na ka sorkar jylla, ba ka sei ban shimkhia lem ha ka ban kren ia ka sorkar Assam, na ka bynta ban weng noh ia kito ki Karkhana kiba don ha ka liang Assam, kiba la long kum ba ki don hapdeng ka Byrnihat, namar hajan jong kitei ki Karkhana, kiba khlain ka jingpynmih tdem, ka dei ka jaka ba shong ba sah ki briew ka Byrnihat” ong u Samla Ferdynald K. Kharkamni.

Halor katei ka jingjaboh ka Lyer ha Byrnihat, na ka liang kan ym shongthain, ha kaba shen kin sa leit ban kynduh ia ki nongialam ka Synjuk ki Rangbah Shong ka Thain Byrnihat, na ka bynta ban iakren sani bha halor katei ka phang, u la bynrap.