Shillong: Ka jingiakawang ktieh hapdeng ka Congress bad ka BJP ka la iai bteng ha kaba iadei bad ka ka jingthied ia ki liengsuin iapom Rafael. U Gaurav Gogoi, nongai ktien ka All India Congress Committee (AICC) uba dei ruh u MP na Assam, mynta ka sngi u la kynnoh ba ka BJP ka la pyrshang ban ialam bakla ia ka Ing bishar ba ha khlieh duh, ka Supreme Court kaba la pynksan ia ka sorkar NDA ba la ialam da ka BJP ha kaba iadei bad ka Rafael.
Haba kren bad ki lad pathai khubor ha Shillong, u Gaurav u la dawa ba ka Supreme Court ka dei ban weng noh ia ka rai ba ka la dep ban pynmih kaba la pynksan ia ka BJP, da kaba kynnoh ba ka BJP ka pynphriang ia ki khubor ki bym shisha.
Katkum ka jingkam u Gaurav, ka Supreme Court kam dei ka ba lah ban khmih ia kam bamsap bad ia ki briew kiba iohnong na ka bad kan nym lah ban khmih ia baroh ki jingduna ha kaba ia dei bad ka jingthied ia ki liengsuin iapom, hynrei ka don la ki jing ki kyndon treikam ba la pynkhamti ha ka.
U Gaurav u la ong, “Ngi dawa beit ban aiti ia kane ka kam ha ka Joint Parliamentary Committee (JPC) namar ba ka Ing dorbar Parliament ka kham donbor ban ia ka SC ha kaba iadei bad kane ka jingthied ia ki liengsuin iapon Rafael”.
U la dawa ruh ba ka Supreme Court ka dei ban pynshitom ia ka sorkar BJP kaba la pyrshang ruh ban thok bad ialam bakla ia ka Kashari ba ha khlieh duh, bad ha kajuh ka por u la dawa ba ia kane ka kam dei ban aiti beit ha ka JPC lada ka sorkar u Modi ka khlem buhrieh eiei sha lyndet kane ka jingthied liengsuin Rafael.
Ha kaba iadei bad ka jingkynnoh u Myntri Rangbah ka Tripura, u Biplab Kumar Deb ba ka Congress ka don jingiadei bad sylla bad ki ri ba nabar ban pynbudnam ia ka ri India, na ka liang u Gaurav u la kynnoh kylla ba ka jingiasylla ka dei kaba hapoh ka ri India hi, kata hapdeng u Anil Ambani bad u Myntri Rangbahduh, u Narendra Modi tang na ka bynta ban ioh kamai pisa, bad bynrap shuh shuh ba ka jingiasylla ka long ban shukor ia ki paidbah ka ri da ka sorkar BJP.