Shillong:U MLA ka North Shillong u bah Adelbert Nongrum ha ka 4 Tarik Iaiong u la leit ban ia kynduh ia u Chairman ka Meghalaya Industries Development Corporation (MIDC) u James PK Sangma, ban pan jingshai halor ka jingkynnoh ba ka MIDC ka la thied ia ka jaka ha ki thaiñ Ribhoi District.
Haba kren sha ki ladpathai khubor u bah Adelbert Nongrum u la ong ba ka jingwan ia kynduh ia u Chairman ka MIDC ka long hadien ba na ka sengbhalang CORP na Ribhoi, ka la kynnoh ba ka MIDC ka la thied jaka ha ki thaiñ Ri Bhoi.
“Na ka liang jongnga, nga ai khublei ia ka CORP ba kin dang buddien ia kane ka mat bad nga kum u wei na u MLA ngam hun ban trei tang na ka bynta ki mat ha ka Constituency, hynrei nga shim khia halor ka mat kaba iadei bad ka Jylla khamtam ha kaba iadei bad ka mat khyndew” u la ong.
“Nga khlem pynkhreh ia ka jingthoh, hynrei nga wan ban ia kren bad u Chairman ban tip ia ka jingshisha ba ka MIDC ka la thied ia ka jaka ba 300 akar bad halor kane na ka liang u James PK Sangma, u la pyntip ba kam don eiei kum kata” u la bynrap.
Nalor kine u bah Adelbert Nongrum, u la kylli ruh halor ba ka MIDC ka la thied ne em ia ki jaka sha kiwei pat ki thaiñ ha ka Jylla, ia kaba na ka liang u Chairman u la pyntip ba kam don eiei kum kata.
U la kylli ruh ba ka MIDC ka la ioh ne em ka mang pisa na ka sorkar ban thied jaka, ha kaba u James u la ong ba kam pat don kum kata bad kdew ruh ba ha ki por mynshwa ka don kata ka jingthied jaka, hynrei mynta la san snem ki khlem pat don eiei kum kata.
“Na ka liang jongnga, ngam hun ban rah ia kane ka mat tang hapoh ka assembly namar ba duna palat ka por, hynrei nga iai pynpaw da ka dei shabar ka assembly ruh” ula ong. “Hapoh Assembly ngi la iohi ba ka sorkar kan ym iaid shakhmat ha kaba iadei bad ka Landbank, kumta nga la wan ban ia kynduh ia u Chairman ka MIDC ha kaba ia dei bad ka mat khyndew” u la ong.
Phi don ban ong eiei?