Halor ka jingshem jing eh jong ki khynnah skul ban ioh bynta ha ki online class

Editor,
Ngi la iohi ba haduh katno ka jingshah ktah jong ki briew na kane ka khlam ba shyrkhei, la ha ka trei ka ktah , ka kamai kajih, ba man la ka sngi ka pule puthi bad kiwei kiwei de ki kam, ha kaba baroh ki la thut bad sah teng lut la ha ki sor ne nongkyndong. Ha kane ka shithi nga kwah ban pynpaw ia ki jing eh Khamtam eh kiba ki khynnah jong ngi ki iakynduh, kata ka jing eh ba Kham kongsan eh ka long ba kumno ki lah ban pynioh bynta lem ne ban access ia ka online class kaba ki nonghikai jong ki ki la sdang ban pyntreikam na ka daw ka Jingkhang dam jong ki skul kaba la neh mynta la kumba 4 bnai tam mynta.

Ka jingthmu jong ka online class ka long kaba bha bad ioh jingmyntoi haduh katta khamtam haba khang ki skul kumne, hynrei ka jing eh kaba mih na ka online class ka long ba bun ki khynnah skul khamtam kito kiba sah ha nongkyndong bun na ki kim dei ki ba ioh ba kot bad ki ia don shibun ngut shipara ha kaba ki kmie ki kpa jong ki,ki trei shitom da kaba tyngeh shisha ban pynleit skul ia ki baroh, hynrei lada ki hap ban leh online class bun ki kmie ki kpa jong ki kin ym lah ban pynioh bynta lang ia la ki khun jong ki ha kane ka class namar duna ka jingioh, tang ka bai skul bad bai kot jong ki khun ruh ki kmie kpa ba duk da ka ba shitom shisha ki pynioh, namar ki thrang ba ki khun jong ki ruh kin ioh lem ia ka lawei ba phyrnai kaba dei ka hok ki khun jong ki.

Hynrei da donkam ban leh ia ka online class ki hap ban pynthied sa ki mobile smart phone ne kino kino ki kynja tiar mobile ba Kham rem khnang ba ki khun jong ki kin ioh bynta lem ha kane ka class online, lada dei lei kiba iadon iabun ngut shipara kane ka wanrah jing eh shibun eh ia ki kmie ki kpa jong ki khynnah skul. Kane ka jingthoh kam dei ba ka pyrshah ia ka online class hynrei baroh ngi tip ba ka online class hi kadei kawei ka lad kaba ai jingmyntoi shibun ia ki khynnah skul baroh khamtam ha kum kine ki por khang dam.

Hynrei Nga shu kwah ban pynsngewlem ia ki jing eh jong ki khynnah skul kito ki bym dei than ki ba bit ba biang ha iing ha sem.

Nga kyrpad ba ka sorkar tnad pule puthi lyngba ki nonghikai kin wad shuh kiwei kiwei de ki lad ban ioh iarap lang ia baroh ki khynnah kum ha kane ka por khnang ba ka jinghikai ba ki nonghikai ki ai kan ym noh shilliang shano shano ruh hynrei kan long beit mar katjuh ia baroh ki khynnah skul.
Baniakmen Kshiar
Pynursla Neng gate
Student.