Halor ka jingshah pyniap ki arngut ha Ichamati, lada ai jingbit ban shong kyrain ka MLMDF, ai lem iangi ruh, ong ka HITO

Shillong:Ka Hynniewtrep Integrated Territorial Organisation (HITO), ka la phah da ka jingthoh sha U Deputy Commissioner, East Khasi hills, ha kaba ka sngew pyrshah jur, halor ka jingai jingbit ia U SK Choudhary, uba dei na ka seng MLMDF, halor ka jingthmu jongu ban shong kyrain, kum ka jingpyrshah halor ka jingshah pyniap jong ki arngut ki bar jylla ha Ichamati.

Katei ka seng, ha ka shithi sha U Deputy Commissioner, ka pynsngew halor ka jingialeh jong u khun Khasi, kaba la bteng la 76 snem kynthih, lyngba ka jingwan thombor ki briew kiba nabar, ha ka kamai kajih bad ka ioh ka kot bad nangta ka jing bym burom ruh ia ki lai tylli ki jingiateh soskular, kiba kynthup ia ka Annexed Agreement, ha kaba iasoi ia ka Instrument of Accession bad kaba la mynjur da ka sorkar India bad sa ka National Commission for Schedule Tribes (NCST) kaba la pynmih da ka sorkar India, ha u iaiong 2012, kaba la thoh sha ka tnat kam poh iing ka sorkar India bad ka tribal affairs, ha kaba la mynjur ban pynrung ia ka Annexed Agreement hapoh ka riti synshar jong ka Ri India, hynrei ia katei ruh la kyntait noh da ka sorkar India bad ka sorkar Jylla bad kaba la pynkhein noh ia Article 338A jong ka riti synshar ri.

Ka HITO, ka ong shuh shuh ba ka seng kam pyrshah ia katei ka jingshong kyrain jong ka MLMDF, hynrei ha kajuh ka por, ka HITO, ka dawa, ba lada yn shah ia katei ka seng, ba kan shong kyrain, kumta dei ban shah lang ia ka HITO ruh, ba lum lang ha katei hi kajuh ka sngi, ban pyrshah halor ka jingshah pyniap jong u bah Lurshai Hynniewta, ha kajuh ka sngi, ba yn shah ia ka MLMDF, ba kan shong kyrain ha Shella/Sohra lane ha Shillong, ong ka kyrwoh na U bah Donbok Dkhar, President bad U bah Wanbun N Dkhar, Secretary jong ka seng.