Halor ka jingshah kynnoh thep umphniang khlem siew pisa, shah rah u President ka RBYO

Nongpoh: Hynnin ka miet ki Pulit Ri Bhoi, ki la bat bad rah sha ia u sha thanad Byrnihat, ia u Bah Baiateilang Lapang, President ka Ri Bhoi Youth Organization (RBYO) na bynta ban tohkit ia u halor ka jingujor da kawei ka Petrol Pump na Byrnihat, kaba la kynnoh ba u la leit ban thep umphniang khlem siew pisa bad dawa pisa ruh na kawei ka Petrol Pump ha Byrnihat.

U Giri Prasad, Superintendent of Police ka Ri Bhoi, u la ong ba ki Pulit kim pat kem ia u Bah Baiateilang Lapang, hynrei la shu rah ia u sha thanad, na bynta ban tohkit halor ka jingujor da ki briew jong kawei ka Petrol Pump, kaba la kynnoh, ba utei u nongïalam ka RBYO, u la leit ban thep umphiang khlem siew pisa bad nalorkata u la dawa pisa ruh na katei ka Petrol pump.

U la iathuh ruh, ba dei halor kane ka jingujor ki pulit ki la register mukotduma katkum ka Nongpoh PS case No. 124(11)2023 U/S 384/506/34 IPC ha thanad Nongpoh bad ki pulit ki la phah da ka 41 A notice.