Halor ka jingleh tohmet ia u doctor ha Muktapur, la dep ia pynbeit, ong u heh ki BSF

Shillong:U Inspector General (IG) ka Border Security Force (BSF) Meghalaya u MS Dhillon u la ong ba ka jingjia shah kynnoh leh tohmet u Dr. Seibok Buam ha ki BSF, la dep ban iapynbeit da kaba iasngewthuh jingmut hynnin ka sngi.

Ha ka sngi u Blei, la kynnoh ba u Dr. Seibok Buam ka tnad ri mrad u la shah leh tohmet ha ki BSF ha thain Muktapur, West Jaintia Hills, bad la kynnoh ba ki BSF ki la phah law lyngkhuid bad byrngem siat ruh ia u.
Haba kren mynta ka sngi hadien ka jingialang bad u symbud myntri rangbah ka jylla bah Prestone Tynsong, u MS Dhillon u la ong ba ka tnad BSF ka dang pynlong ia ka jingtohkit halor ka jingshah kynnoh ba leh tohmet ia u Dr.Seibok ban tip ia ka jingshisha baroh.

Hynrei ha kajuh ka por, la iathuh ba la dep ban iapynbeit ia kane ka jingjia hynnin ka sngi hapdeng ka jingdon lang ki bor sorkar ka Amlarem Sub-Division, ki pulit, bad ki nongshong shnong.
“Ka jingjia ha khappud la dep pynbeit da kaba iasngew tynnad hynnin ka sngi”, la ong u IG BSF. U la bynrap, “Ia ka jingkynnoh ba shah byrngem siat u ophisar ka tnad ri jingri ha ki BSF dang pynlong ia ka jingtohkit da kaba pynshong nongrim ia ki jinglong syier ka jaka, ka rukom treikam bad jinglong discipline ki BSF”.

U Dhillon u la iathuh ba ki BSF ki la pynthikna ba kaba kum katei ka jingjia kam dei ban jia biang nangne shakhmat.
“La iapynbeit hynnin ka sngi bad u Dr. Buam, ki sengbhalang, ki bor shnong, ki pulit bad u SDO, nalor u Company Commander BSF bad la iapynbeit da kaba iasngewthuh jingmut. Ngi la pynthikna ba haduh mynta bad nangne shakhmat ngi trei na bynta ka jingbit jingbiang jong ki paidbah”, la ong IG BSF.