Halor ka jingjop IAS “Nga iathuh nyngkong eh ia i hynmen kynthei, nangta pat sa ia I Mei

I Dukini Kyndiah (31), iba sah ha Dulong, Jowai, ila jop ia ka eksamin IAS, ha ki khyndiat sngi ba ladep bad i dei ruh tang marwei hi, kaba la jop, ha ka jingiakhun ia katei ka eksamin na ka Jylla Meghalaya.
Halor ka jingjop jongi, I Dukini, ila jubab ia ki jingkylli, ba la buh da U Rupang, da ka email bad ki jingkylli bad ki jubab ki long kumne harum –
RP:Khublei shibun eh Dukini, namar ka jingjop jongphi, ha ka eksamin IAS, kaba dang shu pynbna shen ha ki khyndiat sngi ba ladep. Kumno phi sngew, tang mar shu ia tip, ba phi la pass ia katei ka eksamin? Phim kyndit, phi iam ne phi phuh samrkhie? Iano phi ia thuh nyngkong eh, ia katei ka result, kaba khraw tam ha ka jingim jongphi?
DK:Ha ka sngi ba nga ioh jingtip shaphang ka result Jong nga, nga la don hi khyndiat I jingduhkyrmen, hynrei wat la katta ruh, ka jingpaw jong ka kyrteng jongnga ha ka list ka la wanrah ka jingkyrmen kaba kmen haduh katta katta. Nga la iathuh Nyngkong eh ia I hynmen kynthei ia ka result, nangta pat sa ia I mei.
RP:Phi la pyndep ia ka jingpule ha ka kyrdan aiu bad ha u snem aiu? Mynta phi trei kam eiei ne phi dan shong iing?
DK: Nga la pyndep ia ka Mcom ha NEHU ha u snem 2012. Hadien kata nga la sdang pynkhreh na ka bynta ka eksamin civil services. Mynta te, ngam pat trei haei haei ruh.
RP:Kumno phi pynkhreh ia ka eksamin IAS bad katno snem, phi lah pynkhreh? Katno kynta ha ka shisngi, phi don ha ka jingpynkhreh ia katei ka eksamin kaba eh tam jong ka India?
DK: Nga la sdang ban pynkhreh na ka bynta Kane ka exams na u bnai September 2013 . Nga shong pule kot kumba 5 haduh 7 kynta shi sngi. Nga kham pule bha shaphang ki general studies bad ki jingjia ba man ka sngi.
Ban pynkhreh na ka bynta Kane ka exams, Nyngkong nyngshap eh phi dei ban ngeit ha lade bad ha ki kam ba phi lah ban leh. Ka jingminot , jingtrei shitom bad ka jingiaishah ruh ki dei kiwei na ki kam ba phi dei ban leh. Bad ka ba kham jynjar duh na kine ka long ba lada phi kloi ban ialeh ia kitei ba la batai haneng.
Ki kot ba nga khreh ki kham bun na ki kot NCERT Jong ki class 6 haduh class 12. Bad na ka bynta ki jingjia ba man ka sngi nga shu pule da ki kotkhubor.
RP:Ngam kynmaw, la ki la don ne em kham mynshwa, kiba la ioh ia kane ka burom na ka sor bah Jowai. Kumta, haba phi la ioh ia katei ka kyrdan kaba khraw, kaei kaba kiba I Mei jongphi, ki hynmen ki para lane U Kpa jongphi lem bad ki marjan marpa bad ki para shnong para thaw, ki leh iaphi?
DK: Hadien Kane ka jingjob bakhraw jong nga, baroh ki bahaiing bahasem, ki paralok ki jor, ki para marjan Marpa jong nga ki la kmen shisha ban iohi ba nga la ioh ia u soh ba thiang hadien ka jingtreishitom jong nga , bad nga ai khublei lut ia ki baroh.
Nga sngewkmen shibun ba nga la pass ia Kane ka exam tangba kane ka jingjob bakhraw jong nga kan ym urlong lada khlem don lang ka jingai mynsiem lem jong I mei, ki hymmen bad ki baha ing bahasem baroh. Ki la don bun ngut na kane ka jylla Meghalaya jong ngi kiba la pass ia Kane ka exam shwa jongnga bad nga ngeit shkem ruh ba ki dang bun ki ban pass hadien jong nga ruh.
RP:Kaei ka jingai jingmut lane ka khubor, kaba phi don sha ki khun samla jong ka Ri Khasi Jaintia, halor katei ka jingjop jongphi bad ha kiba kum kine ki sngi jong ka jingkyrduh kam kaba jubor bha ha ka Ri jongngi.
DK:Ka jingai jingmut Jong nga na ka bynta baroh ka long ba ka jingtreishitom, ka jingngeit halade bad ka jingiaishah kan lam lynti ia phi sha ki jingjop kiba khraw ha ka jingim jong phi.
Khublei shibun.