Shillong: Myn hynnin ka sngi 9 ngut ki samla kiba sah ha Madanryting ki la shah thombor ha ki paidbhur ha ka shnong Jatah kaba hap ha Mawkynrew Block. Ha katei ka jingjia, u Macmilan Kharshandi 25 snem ka rta u la khlad noh, hadien ka jing shah shoh katba u Teiborlang Kharbangar bad u Ricky Dkhar ki la mynsaw jur ha kane ka jingjia.
U Alfredy Sohtun, u Vishah Dev Verma, u Bijay Singh, U Rohit Suting, Banteilang Kharumnuid bad u Pappu Deka ki 6 ngut ki la ioh ban phet na ka tei ka jaka bad rieh ha khlaw katba ia ka Jeep ka ba kine ki samla ki la leit kai ka ba don ia u numbor ML 10 B 0957 ka la shah thang ha ka tei ka jingjia.
Haba ia kren bad u ba la mynsaw ha kane ka jing jia u Ricky Dkhar u la iathuh ba ki la ia leit bam khana ha ka shnong Syntung bad ha ka por ba la ia wan phai kum ba 4:30 baje eiei ynda la lait na ka jaka ba ki leit kai, ki la kum bakla lynti bad ki la ioh kum rung sha ka shnong Jatah bad dei hangta ba ki briew ki la bat ia ka kali bad ki la sdang ban tohkit ha ka ba ki la shu kynnoh beit ba ki dei ki mynshohnoh.
U la iathuh ruh ba ha ka jingtieng ba lamih ki paidbur ki la mut ban ia phet noh na ka tei ka jaka hynrei ki paidbhur kiba la rah da ki dieng bad ki tiar pynmynsaw ki la tan ia u nongniah kane ka jeep u Teiborlang Kharbangar bad ki la shoh ia u katba kiwei ki la iaphet na ka tei ka jaka ha kaba u Ricky Dkhar bad u Macmilan Kharshandi ki la shah bat ha ki paidbah bad shah shoh haduh ba u Macmilan Kharshandi u la khlad noh.
U nongniah ka Jeep u Teiborlang Kharbangar, u la iathuh ba ha ka por ba ki iakren ki la kynnoh beit ba ki dei ki mynshohnoh bad dei ha kane ka por ba ki la sngewthuh ba kin sa shah thombor ia ki, kumta ki la mut ban phet noh na ka ne ka jaka bad ha ka jingthmu banphet ki la kum dei ia u wei u briew u ba dei u nongshong shnong ha kaba na ka liang ki paidbah ki la tan beit beit ia u nongniah kali bad shoh ia u haduh un da mynsaw jur.
Haba ia kren bad uwei na ki ba ioh ban phet sha khlaw u Banteilang Kharumnuid, u la iathuh ba haba ki la shah bat ha ki shnong ha ka jingtieng ba ioh ki shah thombor ki la shu phet noh sha khlaw bad 4 ngut na ki, ki la rieh noh ha khlaw haduh 3:30 baje mynstep ynda lawan ki pulit ki sa ioh lad ban mih na kane ka khlaw bad ki la wan poi ha Shillong kumba 6:00 baje mynstep. Ia kine baroh la wan ialam noh da ki pulit sha Shillong ki ba mynsaw ki dang don hapeng ka jing sumar ha Civil Hospital bad ia u ba la khlad la rah sha civil Hospital ban leh ia kaba donkam bad ynda ladep ki la aiti noh sha kiba ha iing.
Phi don ban ong eiei?