Halor ka dulir 1971, pynbeit pud sha ka dong shatei mihngi, ong ka Congress

Shillong:Ki nongialam jong ki seng samla ka Congress, ki la thoh sha U Narendra Modi, myntri rangbah duh ka Ri, ha kaba ki la dawa, ba dei ban pynbeit noh mar mar ia u pud u sam jong ki jylla shatei lam mihngi.

Ha katei ka jingthoh, la pyni halor ka jing ia kynad kam pud jong ka Mizoram bad ka Assam bad halor katei hi ka phang, la pyni ruh halor katei kajuh ka jing ia kynad kam pud kaba don bad ka Assam, ha kaba ki jylla, kiba kynthup ia ka Meghalaya, Nagaland, Mizoram, Arunachal, ki don ia katei kajuh ka jing ia kynad ba ka Assam bad halor katei ka mat, la dawa ia ka tnat poh iing ka sorkar India, ba kan pynbeit noh mardor ia katei ka jing ia kynad.

La ong shuh shuh, ba halor kane ka mat, kaba donkam ban ia pyn shong nongrim, ka dei halor ka ain kaba la don lypa ha u snem 1971, ka North Eastern Regions (Reorganisation) Act, 1971 bad ba ki jylla, kiba don bynta lang kin ia rai halor katei ka kam, ong ka kyrwoh na U Geli Eti, President Arunachal Pradesh Youth Congress, U Mahananda Nungleppam, President, Manipur Pradesh Youth Congress, U Richard Mrong Marak, President, Meghalaya Pradesh Youth Congress, U Dr. Lalmalsawma Nghaka, President, Mizoram Pradesh Youth Congress, U Limayangba Longkumer, President, Nagaland Pradesh Youth Congress, U Pujan Biswas, President, Tripura Youth Congress.