Shillong:Halor ka jingioh ban shna ia ka Casino ha Byrnihat Ribhoi District na ka liang u Chief Excutive Member ka Khasi Hills Autonomous District Council (KHADC) u bah Titos W Chyne, u la pan ka jingpynshai na u syiem ka Raid Marwet.
Haba ia kren bad u Rupang, na ka liang u CEM ka KHADC u la iathuh ba hadien ba u la ioh ia ka jingtip halor ka jingshna ia ka casino ha Byrnihat Ri Bhoi District u la pan ka jingpynshai na u syiem ka Raid Marwet halor ka jingioh NOC ban shna ia ka Casino ha kane ka jaka.
“Ha kine ki sngi ngi la iohi lyngba ki lad pathai khubor halor ka jingioh NOC na u rangbah shnong bad u syiem Raid Marwet bad na ka liang ka Council ka la shimkhia bad pan da ka showcause notice na u syiem ka Raid marwet ba yn pynshai halor kane hynrei haduh mynta ngim pat ioh ia kano kano ka jubab”u la ong.
U bah Titos u la ong “Lada ngi shem ba ka don kata ka jingai NOC na ka liang u syiem lane u rangbah shnong na ka liang ka KHADC kan sa leh ia kaba donkam bad ngin ym ai lad ia kum kine ki kam ba kin leh khlem da pyntip sha ka ophis ka District Council”.
“Na ka liang jong nga shimet, kum u khlieh duh ka Council ngan ym pdiang ban wanrah ia ka kum kane ka jait jingialehkai ha ka jylla ki ba don shibun ki jingsniew khamtam ia ki khun samla jong ngi bad na ka laing jong nga nga pyrshah jur ia kane ka jingbuh Casino ha ka jylla”u la bynrap.
Phi don ban ong eiei?