Halor ka burom ka akor, hikai kyrpang ka SSS Umden Nongtluh

Nongpoh:  Kan dei kawei na ki nuksa kaba bha tam ia kaba la pyni da ka Seng Samla Shnong Umden Nongtluh, ha kaba hynnin ka sngi Saitjain, ki la pynlong ia ka Prokram kaba shisngi, na ka bynta ban hikai sha ki khun samla katei ka thain haba iadei bad ka burom ka akor, ka jingdih drok, ka shongkha khynnah lem bad kiwei.

Ha katei ka Prokram kaba ki la pynlong ha Umden Parish Hall, ki khun samla kiba la don da ki spah ngut na ki shnong bapher bapher ka thain Umden, ki la wan ban iashimbynta ha katei Awareness Progrram kaba la pynlong da katei ka Seng Samla.

            Ha ka prokram kaba la sdang naduh mynstep, kitei ki samla kynthei bad shynrang, ki la ioh ia shibun ki jinghikai na ki nongwan jinghikai, kiba la batai halor shibun ki jingdonkam kaba kum ki khun samla ki dei ban tip, kata la ka long haba iadei bad ka jingktah na ka jingdih drok, nangta kaba shongkha khynnah bad khamtam eh haba iadei bad ka burom ka Akor, kaba ha kine ki sngi ka la hiar arsut.
            Kiba la donlang ha katei ka sngi, ki kynthup ia u Bah Mayraldborn Syiem, MLA ka Nongpoh, u Bah Thomas Lew Syiem Rangbah shnong ka Umden, Kong Lucia Malai President ka Seng Longkmie Umden, u samla Benedict Maiong President ka Seng Samla, ka samla Susana Syngkli bad kiwei de ki khynnah ka thain Umden.
            Na baroh kiba la ai jingkren ha katei ka sngi, kiba kynthup ia u MLA ka Nongpoh, ki la iaroh shikatdei eh ia katei ka sienjam, kaba la shim da ki nongialam ka Seng Samla Shnong Umden Nongtluh, namar ka dei shisha kawei na ki Prokram kaba don jingmut shikatdei eh, khamtam eh haba iadei bad ka jinglong jingman ki khun samla ha kane ka juk.
            Kaba la pynshon jingmut ia ki nongai jingkren, ka dei halor ka burom ka akor, namar kumba ka long mynta ia ki khynnah bad ia ki khun samla, ym shem la don shuh kiba la hikai halor ka burom ka akor bad kaba la pynlong ruh ia shibun ki samla ba kim tip ban ri ia la ka burom ka akor bad kaba pynhiardor ym tang iai u shimet, hynrei ia ka iing ka sem bad ia ka jaid bynriew hi baroh kawei.
   Namarkata, nalor ka jingdon kiba kum kine ki prokram, ka donkam ruh ia ki kmie ki kpa ba kin shimkhia ha ka ban hikai ia ki khun ki kti, namar lada jia kano kano kaba sniew ia ki khun ki kti, ka dei namar ka jingbymlah ki kmie ki kti ban hikai ia ki khun, kaba la pynlong ba kane ka imlang sahlang ba kan sa sniew kumba ka long mynta.