Halor ka bhah ki samla Khasi, kynduh ki KSU ia u Chancellor ka USTM ha Killing

Nongpoh: Ki nongialam ka Khasi Students Union, Sengkmie, ha ryngkat ki nongialam na Ri Bhoi lem bad ki nongialam ka Education Cell ka KSU, hynnin ka sngi ki la leit ban kynduh ia u M. Houque, Chancellor ka University of Science and Technology, kaba don ha Killing ha Ri Bhoi District.

Katei ka jingleit kynduh da kitei ki KSU, ka long na ka bynta ban iakren halor shibun ki mat bad khamtam eh haba iadei bad ka bhah kyrpang ia ki samla pule Khasi, kiba leit ban pule ha katei ka skulbah.
Ha kane ka jingleit kynduh ia u Chancellor ka USTM, la ialam da u president ka KSU, North Khasi Hills District, u Samla Ferdinald Kharkamni bad u Pynshai Rani, Assistant Secretary ka KSU Education Cell ka Sengmie lem bad kiwei de ki nongialam bad dkhot ka KSU na Ri Bhoi bad Nongbah Shillong.
Haba kren sha ki lad pathaikhubor, u Samla Pynshai Rani, u la ong ba ka jingthmu jong ka seng ban leit kynduh bad iakren ia utei u Chancellor ka USTM, ka long ban pynpaw hakhmat utei u Chancellor, ba ki samla Khasi ki dei ban ioh haba ki kwah ban leit pule ha katei ka jaka.
U la ong ruh kumba long mynta ka jingpynslem ka NEHU ban pynmih ia ka Result, ka la pynkulmar ia ki samla pule ban leit pule ba kin leit wad jaka pule, na ka bynta ban pule ia ki kyndan kiba kham shalor, kumta halor kane ka bynta ka seng ka la ioh ban pynsngew sha utei u Chancellor, ban dawa na u ba um dei ban kyntait ia ki samla Khasi, kiba wan na kino kino ki jaka bad kiba kwah ban leit pule ha katei ka Skulbah.
Shuh shuh, u la iathuh ruh ba ha katei ka jingleit kynduh, ki la ioh ruh ban iakren halor ka bhah kaba kham kyrpang ia ki samla pule kiba dei ki Khasi, namar ba katei ka skulbah ka don hapoh ka jylla, ha kaba ka dei ka hok ia ki trai jylla ba kin ioh ban leit pule ha katei ka jaka.
Nalor kitei ki jingdawa ban pdiang beit ia ki samla Khasi, ka seng ka la dawa ruh na utei u Chancellor, ba u dei ban pyrkhat kham kyrpang ne ban ai ia ka jingpule ei, na bynta jong kito ki samla pule kiba wan na ki longiing longsem kiba duk.
Haba iadei bad katei ka jingdawa ka KSU, utei u samla u la iathuh ba na ka liang, ka pynpaw ia ka jingsngewkmen, namar halor kitei ki jingdawa ka KSU, na ka liang utei u Chancellor, u la ai ka jingkular halor ban pdiang ia ki samla pule Khasi bad ruh ban ai ruh ia ka jingpule ei, na ka bynta jong kita ki samla pule kiba wan na ki longiing longsem kiba duna ka ioh ka kot.
Ha kane hi ka juh ka sngi, kitei ki nongialam ka KSU, ki la leit ruh ban kynduh ia ki samla pule kiba dei ki Khasi, kiba pule ka USTM bad RIST, na ka bynta ban tip naduh ka rukom shim bairung, ka rukom ai jinghikai, ka jingshah niew shilling khmat lem bad kiwei kiwei.
Ki la don ki samla pule, kiba la pynpaw ia ki jingeh hakhmat ki nongialam ka KSU, kumta halor kitei ki jingeh kaba la iakynduh da kitei ki samla pule, na ka liang kitei ki nongialam ka KSU, ki la kular ba kin sa buddien khnang ban lap ia ki jingshisha bad ban iakren pynbeit halor kita ki jingeh, kiba la iakynduh da kitei ki samla.
Ha kajuh ruh ka por, ha kane ka sngi, kitei ki nongialam ka KSU, ki la kyntu ia kitei ki samla pule ha katei ka skulbah, ba ki dei ban long kiba iatylli.