Halor 3 ki HNLC, dei ka jingtohkit ba laitluid jong ka NIA, ong U MR

Shillong:U Conrad K Sangma, Myntri rangbah ka jylla, u la iathuh ba na ka liang u Myntri korbar ri ka Ri India, u Amit Shah u la bthah ia ka sorkar jylla, ba kan pyniaid noh ia ka jingkren ia suk bad ka Seng kieng atiar HNLC bad kum juh ban sdang noh ia ka jingiakren halor ka jingpynbeit u pud u sam hapdeng ka jylla Meghalaya bad Assam.

Haba ia kren bad ki lad pathai khu bor na ka liang u Myn tri rangbah u la ong “Ka jingiakynduh, ia u myntri korbar ri jong ka ri India ka long ban pyntip halor ka jingsdang ka jingiakren halor ka jingpynbeit u pud u sam ha ka wat ba ar.

U la bynrap “Nga la iathuh halor ka jing sdang ka jingiakren ha ka wat ba ar halor ka jingpynbeit ia u pud u sam hapdeng ka jylla Meghalaya bad Assam bad halor ka rai ban thaw ia ki Regional Commitee”.
U la ong “Na ka liang u Myntri korbar ri ruh u la pynpaw ia ka jingkmen halor kane ka sien jam bad pynpaw ruh ia ka jingkyrmen ba ia kane ka mat ngin lah ban pynbeit noh kham kloi”.
U Myntri rangbah u la ong “Ka wat ba ar jong ka jingpynbeit u pud u sam kan long kaba heh, ka ban dang shimpor bad ka ban kham eh hynrei ngin trei shitom ban lah ban pynurlong noh shen”.

U Myntri rangbah u la iathuh ruh ba u la rah ruh ha khmat u Myntri korbar ri, ia ka mat ia kren ia suk hapdeng ka Seng kieng atiar Hynniewtrep National Liberation Council (HNLC) bad ka sorkar.
“Nga la rah ruh ia ka mat halor ka jingiakren ia suk hapdeng ka HNLC bad ka sorkar bad nga la batai ia ki sienjam ki ba ngi la shim bad thmu ban pyniaid shakhmat ia kane ka mat “u la ong.
“Ka jingiakren ka la iaid shakhmat bad ngi kyrmen bad shaniah ruh ba ngin lah ban pynbeit noh ia kane ka mat ruh khnang ba ngin lah ban pynneh ia ka suk ka sain ha ka jylla”u la bynrap.

Halor ka jing Chargesheet ka NIA ia ki 3 ngut ki nongialam ka HNLC u Myntri rangbah u la ong “Kane ka dei ka jingtohkit ba laitluid bad kan ym don kano kano ka jingktah ia ka jingiakren ia suk hapdeng ka HNLC bad ka Sorkar.
U la bynrap “Ka dei ka jingtohkit ba laitluid ba la leh da ka NIA bad nga pynthikna ba kane kan ym ktah eiei ia ka jingiakren ia suk bad ka Sorkar pdeng ruh ka dei kaba don bynta lang ha ka jingiakren ia suk. kumta ka sngewthuh ia ka jingeh ka ban mih na kine ki sienjam”.
“Ngi donkam ban ia kren la ka dei ha kano kano ka bynta bad nga pynthikna ba kan ym don kano kano ka jingeh na ka ne ka jingtohkit jong ki agency kiba laitluid “u la bynrap.

Halor ka jingsdang ka jingiakren ia suk, u Myntri rangbah u la ong “Ngam lah ban ai ia ka tarik ba thikna lano kane ka jingiakren kan sdang, hynrei ka jingiakren kaba long unofficial ka la sdang”.
U Myntri rangbah u la iathuh ruh ba u laai ruh ia ka kaiphot halor ka jingtreikam ka sorkar MDA, ha khmat u Myntri korbar ri,u Amit Shah, ha kaba iadei bad ka jingwanrah ia ki kam pynroi ha ka jylla.