Hakhmat iing u myntri sorkar, tur ki samla Congress

Shillong, 21 Nailur:
Ka Meghalaya Pradesh Youth Congress ka la leit ban tur sha iingsah u myntri sorkar pdeng u Ravi Shankar Prasad uba bat ia ka tnad Telecom bad ka la pyn long ruh ka jingialum lymbung ban pyrshah ia ka sorkar kaba la lam khmat da ka seng BJP halor ka jingpynduh pyndam noh ia ka Postal Stamp jong ka Indira Ganshi bad u Rajiv Gandhi.
Katkum ka kyrwoh na ka Indian Youth Congress ba la soi da u Amrish Ranjan Panddey uba dei u IYC National Media Co-Ordinator u la ong ba kitei 2 ngut ki dei ki riew khraw kiba la shah siat iap ha ka por ba ki dang don hapoh ka kam bad ka la kynnoh ba ka jingle ka BJP ka pyni ba kam shym la burom ia kitei ki riew khraw hynrei ka la leh pynban ia ki politik kiba jakhlia.
Ka Indian Youth Congress kaba la ialam da u President jong ka u Amarinder Singh Raja ka la leit ban tur shakhmat ing utei u myntri sorkar pdeng ha ka 17 tarik mynta u bnai. ”Ki dei ki kam nuit tuh jong kane ka sorkar BJP kaba la pynduh pyndam noh ia ka jingkynmaw ia kitei ki ar ngut ki riewkhraw ka ri” ong u Amarinder Singh Raja President ka Youth Congress.
“Ki lah ban pyndam ia ka kyrteng jong ki ha ka Stamp hynrei kin ym lah pat ban pyndam ia ka jingkynmaw u paidbah ka ri ki bym shym la lah ban klet ia ki kam ba bha ba kitei ki 2 ngut ki la leh ia ka ri, ngi dawa ba ka sorkar ka dei ban panmap halor katei ka rai jong ka” u la ong biang.
Ki la don da ki spah ngut ki samla seng Congress kiba la wan ban ia shim bynta ha katei ka jingleit tur sha ingsah u myntri ka tnad Telecom ha kaba ki nongiakhih ki la ia pyrta ruh pyrshah ia u Narendra Modi myntri rangbah duh ka ri bad ki la kynnoh ba u dei uba isih ia ki nongialam ka Congress.