![](https://www.urupang.com/wp-content/uploads/2024/07/image-75.png)
Shillong:Ka seng ki nongkhaïi jhur hapoh ka lama ka Meghalaya Gingers and Fresh Vegetables Association mynta ka sngi kala iakynduh ia ka myntri ka tnad ka rep ka riang ka jylla, ka Kong Ampareen Lyngdoh ban ujor ia ka jingeh jongki khamtam ka jingshah khrong pisa beain ki kali kit jhur ba leit shalan sha thain Assam bad kiwei ki jaka.
Haba kren mynta ka sngi, u nongialam ka seng u bah Bristar Mawthoh ula ong ba k ila ujor sha ka myntri, hadien ba ka jingshah pyndik ki kali kit jhur ka la bteng haduh kine ki sngi wat hadien ba ki nongialam ka sorkar kynthup ki symbud myntri rangbah bah Sniawbhalang Dhar, bad kumjuh u bah Prestone Tynsong ki la pyllait na ka jingshah khrong ha jingkieng thew ne weighbridge.
U la iathuh ba ka myntri hadien ba la ioh sngew ia ka jingeh jong ki nongkhaïi jhur, ka la pynthikna ban lum ia ka jingialang jong ki tnad sorkar naduh ka tnad ka rep ka riang, ka transport, bad kumjuh ia ka tnad pulit.
Ki nongkhaïi jhur kila kam ba ki dang hap leit thew ha weight bridge bad lada tam tang 100 kilo, ki la shah shim 1000-2000 tyngka. Man ka por ki la ujor sha ki pulit, sha ka sorkar khlem long kam eiei. Ki jaka ba ki khrong pisa ia ki kali kit jhur ka dei ha thain Khliehtyrshi, Ratacherra bad Umling.
Ki la kynnoh ba ka jingkhrong beain jongki, teng teng ka la poi sha ka jingiakynroi ruh bad ki nongniah kali kit jhur.
Phi don ban ong eiei?