U nongai jingmut jong ka sorkar ba shipor jong ka Bangladesh, U Mahfuj Alam, ha ka sngi hat majai, ula kam, ba ki don haduh shilak ngut ki dkhot jong ka seng Awami League bad ki nongkyrshan ba satar jong ka Sheikh Hasina, kiba la phet rieh sha India.
U Alam, ula kren ia kane, ha ka por ba pynlong ia ka jingialang ban rakhe ia ka Eid ha Dhaka, ha kaba la wan ia shim bynta da kiba bun, kiba la shim ba ki la jah rngai ne shah pyniap, ha ka por jong ka jingsynshar ka Sheikh Hasina.
U Mahfuj, ula kynthah jur ia ka Hasina, da ka pyniap bein ia ki paidbah bad nangta ka sa jah rngai ialade, na ka bynta ban pynhiar kput halor ka jingshah pyniap jong ki kmie ki kpa jongka. “Ka jingjah briew, kaba bun tam, ka dei ha ki snem 2013-2014, haba ki paidbah, ki iakhun, na bynta ka hok jongki ban ioh ban thep vote bad ka jingthmu ha katei ka por ka long ban pynduh shisyndon ia ka rukom pyniaid ia ka jingthep vote jong ki paidbah” ula ong bad la iathuh ba ka sorkar, ka la thaw ia ka kynhun tohkit ban wad ia ki jingshisha, halor kito ki briew kiba la shu jah rngai bad halor ka jinglap jong ka komishon, kumta la hukum ban kem ia kiba bun ngut ki briew kiba don bynta ha katei ka jingpynjah rngai ia ki briew bad nangta ki dang don shuh shuh ki jingtohkit, kiba dang iaid haduh mynta.
U Mahfuj, u kynnoh ruh ba ka sorkar jong ka Awami League, ka ju pynhap ha ki kyndon lehnoh ia kito kiba ialeh pyrshah ia katei ka sorkar ha Bangladesh bad ka shu pynjah klep ia kitei ki briew bad nangta ki sa pyndik ia ki iing ki sem jongki bad u ong ruh ba mynta haba ka don ha India, hynrei ka iai bteng ban pyniaid ia ki kam kiba long pyrshah ia ka Bangladesh.
“Ka long kaba sngewsih ba ka India, ka ai jaka rieh ia kane ka briew bad kumjuh ia ki kynhun lehnoh jongka bad ngi tip, ba ki don palat shi lak ngut ki dkhot jong ka Awami League, kiba rieh tngen ha katei ka Ri” ula ong shuh shuh.
Phi don ban ong eiei?