“Ka Executive Com mittee (EC) jongnga ka skhem namar ngi don 23 ngut namar ki don tang 6 ngut shabar jong ka Khasi Hills United Democratic Alliance (KHUDA) kaba dei ka kynhun synrop jong ka EC, la ong u bah Pynshngain N Syiem, Chief Exertive Member (CEM) jong ka Khasi Hills Autonomous District Coun cil (KHADC) haba kren tang bad u Rupang ha ophis treikam jongu mynta ka sngi.
Kane ka dei ka jing kynthoh jong u bah Pyn shngain haba u nongaikhubor u la iakynduh ia u ban kylli halor ka jing skhem ka EC jongu, hadien ba ka Hills State People Democratic Party (HSPDP) kaba don 3 ngut ki MDC ka la weng noh ia ka jingkyrshan ia ka EC bad na ka kynhun synrop KHUDA.
Haba pynksan halor ka jingskhem ka Executive Committee (EC), u bah Pynshngain u la ong ka Congress ka don 15 ngut ki MDC nalor kata la ioh ruh ia ka jingkyrshan na ka United Democratic Party (UDP), NCP, bad Independent ruh kumjuh.
U la iathuh ba ka Congress ka don 15 ngut ki MDC, UDP- 4 ngut, Independent-1 (Kong Grace Kharpuri), NCP- 2 ngut bah Sanbor Shullai bad kong Teilinia Thangkhiew, bah Latiplang Kharkongor uba la pyniasoh bad ka KHNAM, kumta baroh ki long 23 ngut, la bynrap u bah Pynshngain.
Haba pynshai halor ka jingkynthup lang ia u bah Latiplang Kharkongor uba la pyniasoh bad ka KHNAM (namar ka KHNAM kam don satia ha ka kynhun synrop KHUDA) u bah Syiem u la ong, haduh mynta u bah Latiplang Kharkongor u dang kyrshan ia ka KHUDA namar um pat ai jingthoh satia ban weng ia ka jingkyrshan na ka KHUDA.
Halor ka jingong ba ki don tang 6 ngut shabar ka KHUDA, katkum u bah Pynshngain u la khein ia ki 3 ngut ki MDC ka HSPDP kiba la weng noh ia ka jingkyrshan bad ia ki 3 ngut ki MDC jong ka KHNAM, lait noh u bah Latiplang Kharkongor.
Haba kynthoh pat halor ka nongrim ba ka HSPDP ka la weng noh ia ka jingkyrshan halor ka jingkynnoh bym shimkhia ia ka ILP bad bym shym la leh kumba la iakren lypa shuwa ban long dorbar, u bah Syiem u la ong “Ban iakren ia kata kam long namar haba la iathep vote ia ka resolution halor ka ILP la jop da 12-6 vote nalor kata kumno ngin mushlia, kam dei ka kamram jongngi ban pyntreikam ia ka ILP, hynrei ka shong ha ka sorkar jylla”.
Haba la kynthoh pat ba ka District Council ka lah ban ai jingmut sha ka sorkar na ka bynta ban pyntreikam ia ka ILP ha ka jylla, u bah Pynshngain u la ong “Haduh mynta ngim pat shim satia ia ka rai la ban kyrshan ne pyrshah halor ka ILP”.
Haba la kylli ia ka daw halor ka jingweng ia ka jingkyrshan na ka EC bad na ka kynhun synrop KHUDA u bah Pynshngain u la ong “Ha ka shithi iehnoh kam kim shym la ai daw ei ei, kumta ngam tip”.
Phi don ban ong eiei?