Haduh mynta dang sah ki paidbah phetwir ha Moolber

Jowai, 31 Nailar:
Ka Jaintia Youth Federation (JYF) bad ka Jaintia Students’s Union (JSU) ka la dawa na ka sorkar jylla bad na ka sorkar Assam ba kan pynbiang shwa ia ki bor pahara ban ai jingiada ia ki paidbah ka shnong Mukhim kiba la wan ban phetwir sha ka shnong Moolber kaba la sdang naduh ka 27 tarik une u bnai.
Ka Sorkar Assam bad ka Meghalaya ka dei ban pynbiang ia ki lad jingiada kaba pura ia kitei ki paidbah Khasi-Pnar kiba la wan ban phetwir ha shnong Moolber ha shwa ba kin leit phai sha ka shnong jong ki.
Na ka liang ka JYF bad JSU ka la dawa ruh ba ka sorkar Meghalaya kan phah ia ki Doctor ban hiar sha Shnong Moolber na ka bynta ka koit ka khiah jong ki
Ki nongialam ka JSU bad JYF kiba la wan jngoh ia kitei ki phetwir ha shnong Moolber ha kane ka sngi U Blei ki la pynpaw ia ka jingsngew khia kaba khraw halor ka jingphet shnong ki paid Khasi Pnar na katei ka thain hadien ba ka seng kaikhlaw ha ryngkat ki riew paidbah ki la wan ban pyntieng pynsmiej bad pynpait pynpra ia ki iing ki sem jong ki.
Na ka liang u President ka JYF u la ong, “Ngim kwah ban iohi ia kum kane ka jingjia, kaei kaba ngi kwah ka long ka shongsuk shongsain ki paradoh parasnam jong ngi kiba shong basah ha ki thain Khappud. Haba don kum kane ka jingshah iuhroit ia ka hok longbriew man briew ka sorkar Assam bad ka Sorkar Meghalaya kadei ban pynbiang ia ki lad ai jingiada kaba pura ia ki paidbah kiba shong ba sah sha Shilliang-Mynriang.
Ka JSU bad JYF ka kyntu ruh ia ki lad pathai khubor ba nym pynmih ia ki khubor ki bym pat da pyntikna bha namar ka ktah ia ka suk ka sain bad ka ba lah ruh ban wanrah ia ka jingiasngewpher jaitbynriew ha katei ka thain.
Kitei ki ar tylli ki seng ki dawa ruh ba dei ban pyllait noh ia u Secretary shnong ka shnong Mukhim u ma Wom Shadap uba la kynnoh shah rahbor. Ia utei u Secretary Shnong um lah ban tip haduh mynta u la shah rahbor ha ka kynhun ki riew kieng atiar ne ha ki riew runar. Ka sorkar Meghalaya kadei ban pynbor ia ka sorkar Assam ban wad ia utei u Secretary ka shnong Mukhim, la dawa ka JSU bad JYF.
Ha kawei pat ka khubor, ki paidbah phetwir na shnong Mukhim ki dang don ha ka iing skul jong ka shnong Moolber haduh mynta ka sngi.
Ka khubor ka la iathuh ba mynta ka sngi ki don ka kynhun pulit Assam kiba la wan ban jngoh ia ki hynreii tang shiphang ki la leit noh
Hynrei ka sngi u DIG ka Assam Police ha ryngkat u SP ka Karbi-Anglong ruh ki la wan jngoh ia kitei ki paid Phet bad ki la pynbor ia ki ba ki dei ban leit phai noh sha ka shnong jong ki.
Hynrei ki paidbah kim treh satia tad haduh ba kin da thikna ban ioh iaka jingiada kaba biang.
Na ka liang ka JYF bad JSU ki la leit ban ia kynduh ia u DC mynta ka sngi, hynrei namar ba u DC u don sha Shillong kim shym la iohlad ban ia kynduh ia u bad ki la rai ban ia kynduh ia u ha ka sngi kaba bud.