![](https://www.urupang.com/wp-content/uploads/2023/06/image-85.png)
Imphal: Ka jingia umsnam ha jylla Manipur ka la bteng biang, ha ka step jong ka sngi saitjaiñ ha Churachanpur bad Bishnupur district, ha kaba da ki tiar kiba khlaiñ la pyndonkam ban pynpra ia ki jingtei.
Katkum ki tyllong khubor kiba bun, ki la ïathuh ba ka jingpynjot pynpra, ka jingtuh jingthiem ka la sdang naduh ka miet jong ka sngi thohdieng bad kut pat haduh ka sngi saitjaiñ.
Kane ka ka kam sniew ka la jia ha Kikwata ba hap ha Bishnupur district bad ha Kangvai jong ka Churachanpur district. Ka jylla Manipur ha ka 16 tarik Jylliew, ka la sakhi ruh ia ka jingmih jong ka huri hura hapdeng ki kynhun shipai pahara bad ki paidbah ba iakhih pyrshah ha ki jaka jong ka Kwakta bad Kangvai. Ka jingiather kuli ba markylliang kaba la neh ruh da ki kynta ha kine ki jaka ka la jia.
Ka jingiather kuli ba la sdang naduh ka por 9.15 baje mynmiet, hapdeng ki bor pahara bad ki paidbah ba la kieng atiar bha, ha kaba kumba 400-500 tylli ki kuli, la synreit da ki paidbah ia ki bor pahara.
Ka jingiather kuli ba markylliang ka la jem noh ha ki khyndiat por, hynrei ha ka por kumba 9.45 baje mynmiet ka jingiather kuli ka la nang kham jur.
Ha kawei pat ka jingjia, ki paidbah ba ia don kumba 300 ngut, ki la pyrshang ban pynpra ia ka ïingsah jong ka Sharda Devi, President ka parti BJP Women jong ka jylla Manipur, ha Porampet jong ka Nongbah Imphal West.
Hynrei, na ka jinglah jong ki bor pahara ban tehlakam, ki la lah ban pynsaphred noh ia ki paidbah bad iada ia kum kine ki jingjia. Ka jinglum briew ha kiba bun ki jaka ha jylla Manipur bad ka jing pynpra ia ki jingtei kiba dei trai da ki ophisar sorkar, ka la jia ha kylleng ki bynta jong ka jylla.
Ki tyllong khubor ki la ïathuh ruh ba ka la don ka jing ialum briew ba palat 1000 ngut ha khmat jong ka Palace Compound, mar syndah bad ka Advance hospital ha ka por 6 baje janmiet, ha kaba ka la don ruh ka jingpyrshang ban leit tuh. Ban iada ia kane ka jing shah tuh, ka kynhun shipai Rapid Action Force, ki la pynbthei ia ki tyndong lyer pynsatkhmat, siat ia ki paidbah da ki kuli jri, ha kaba katto katne ki paidbah ki la mynsaw.
Ki tyllong khubor ki la ïathuh ruh ba kumba 300 ngut ki paidbah, ki la ia lum khrui ha khmat ka Manipur University kiba dang pyrshang ban leit tuh na Iringbam Police station ha Imphal West distrik.
Phi don ban ong eiei?