Haduh 31 tarik, ai por ka SCCCOWMDF ia ka sorkar

rBan thaw plan tih dewiong
Shillong, 5 Nailar:
Ki nongialam ka seng ki nongkhaii dew iong kaba la tip kum ka State Co-Ordination Committee of Coal Owners, Miners & Dealers Forum ( SCCCOWMDF) ka la ai por haduh ka 31 tarik u nailar ia ka sorkar ba kan thaw bad ban pyndep noh ia ka plan tih dewiong ka Mining Management Plan kumba la pan da ka National Green Tribunal (NGT), lym kumta katei ka seng ka la byrngem ba kan kyrpad sha ka NGT ba kan ai bor ia ki ban thaw hi ia ka plan tih dewiong ha kane ka jylla ha ka jaka ba kan thaw ka sorkar.
Haba kren sha ki nongthohkhubor mynta ka sngi ha Shillong Club, u Chairman katei ka seng u bah Sony Khyriem u la ong ba la 15 bnai mynta ka NGT ka la pan na ka sorkar ia ka plan tih dewiong ha kane ka jylla, hynrei kat haba don ka jingiakren, ka sorkar ka shu pan por beit na ka NGT, kaba la pynlong ruh ia ka NGT ban tyrwa hi noh katno por ki kwah hynrei ha kaba khadduh ka la tyrwa hi ba kan ai por saw bnai ka ban kut noh ha u risaw mynta u snem. Haba la kylli na u bah Sony hato ki la ia kynduh ne-em ia ka sorkar ban pynbor ba kan pyndep noh ia katei ka plan tih dewiong, u bah Sony u la ong la hynniew ne phra sien ki la ia kynduh sorkar ban ia kren ia katei ka kam hynrei u la ong ba ka jubab ba la ioh na ki ka long kaba thiang kaba da ki jali ja-um suda. U bah Sony u la ong ba kane ka dei ka sien ba khadduh ba kin shaniah ia ka sorkar ha kaba ki la ai por haduh 31 tarik u nailar bad u la ong ba lada jia ba ka sorkar kam lah ban sei ia kita ki plan ha ka jingshong bishar, ka ban long ha ka 29 bad 30 tarik u nailur, katei ka seng kan pan bor hi noh na ka NGT ba kin thaw plan dalade hi na ka bynta ka jingtih dewiong ha kane ka jylla.
Shuh shuh ki nongialam katei ka seng ki nongkhaii dewiong ki la kynnoh ba ka sorkar ka la pynsngewthuh bakla ia ka hukum ka NGT kaba la pynmih ha ka 30 tarik u jylliew ha kaba ka sorkar ka la ong ba ki nongkhaii dewiong ki hap ban siew shuwa ia ka khajna bad hadien ba la dep siew lut nadong shadong kin sa ioh ban sdang khaii dewiong naduh u Risaw, 2015, hynrei ki la kam ba katkum ka hukum ka NGT ka paw ba tang mar ia thep ia ka bai khajna ( Royalty) bad ia ki Challan ki nongkhaii dewiong kim donkam ban ap haduh ban da dep ki kam ki jam baroh hynrei ki lah ban sdang shalan dewiong noh ha ka sngi kaba bud.
Kitei ki nongialam ka seng ki nongkhaii dewiong ki la iathuh ba haduh mynta ki la theh tyngka haduh T.600 klur tyngka sha ka sorkar ban ioh shalan dewiong, ha kaba na katei ka T.600 klur tyngka , kumba T.300 klur ka dei ka khajna ( Royalty) bad kumba T.300 klur pat sha ka jingsiew kaba dei ban pynneh pynsah mariang. Hynrei ki la pynpaw pat ka jingbitar ba wat la kim shym la pynduh ia ki khajna sha ka sorkar kumba la hukum da ka NGT, pynban kim iohi ia kino kino ki jingkylla ha ka liang ki surok khamtam ha West bad South West Khasi Hills. U bah J.C Diengngan uwei na ki nongialam katei ka seng u la ong ba ki don lai tylli ki jaka shalan dewiong na ka thain West Khasi Hills ba kynthup ia ka Borsora, Cheragoan bad Bakli , hynrei hangtei ki surok sorkar kim long tang ban iaid kali ruh bunsien ki nongkhaii dewiong ki hap ban iaid lynti na ka surok ki riew shimet.
Ka SCCCOWMDF ka la iathuh ba dang ha kine ki khyndiat sngi ki katto katne ngut ki nongialam jong ka ki la wan Delhi ban ia kynduh ia ki myntri sorkar pdeng kynthup u Kiren Rijiju, u Jual Oram ban pynsngew ia ka jingeh ki nongkhaii dewiong ha kane ka jylla bad ki la ong ruh ba ki la ia kynduh ia u Purno A Sangma u Chairman ki MP na katei ka thain Shatei Lam Mihngi ban ia kren ia ki jingeh jong ki khnng bad ban tuklar ban pyllait kloi noh na ka jingsha khang tih dewiong ha kane ka jylla ha ka NGT.