Hadien u jumai ba 4tarik, un wan sa uba kham heh,ong ki stad

New Delhi, 6 ‘lyngkot:
Ka tnat kam poh iing jong ka sorkar India, ka maham ba kan don ka jingkhie jumai kaba kham jur, ban ia kaba dang shu dep jia ha ka lah Sngi U Blei ba ladep bad utei u jumai, u ban sa wan, un dei uba ka jingheh jongu, kan long haduh 8.2 jong ka richter scale lane un kham khlain ban ia katei ruh bad katei ka dei na ka daw, ba ka la don lypa ka jingkhie shong synjor jong ki bynta kiba don shathie shapoh ramew ha ki kjat lum jong u lum mangkashang.
La iathuh ba utei u jumai, uba kham khlain, na uei uba la dep jia, ha ka Lah Sngi ba ladep, uba la trei tyngeh ia ka Jylla Manipur, un lah ban khie biang ha ki sngi ki ban sa wan bad la pyni ba ki jumai, kiba dang shu dep khia shen, ha kane ka thain, ki long kum ka Manipur 6.7 (Kyllalyng kot 2016), Nepal 7.3 (Jymmang 2015) bad Sikkim 6.9 (2011), ha kaba kitei ki Jumai, ki la nang pyn shong synjor ia ka mariang shapoh ramew bad katei kan pynmih ia ka jingkhie jumai, kaba palat ia ka 8.0 magnitude ha ki sngi ki ban sa wan.
Na ka liang jong U Director ka NIDM, U Santosh Kumar, u iathuh ba ki plate, kiba pyniasnoh ia ka Nepal, Bhutan, Myanmar bad ka India, ki don mynta ha ka jingma kaba khraw bad kumta ki jaka kiba don jingma, kiin long ia ka Bihar, UP, delhi bad kiwei, ba kin ia kynduh ia u jumai, uba jur. Kitei ki jaka, ki hap ha ka Zone IV, katba ka thain shatei lam mihngi, ka hap ha ka Zone V.
Ki don ki saiantis, kiba artatien ia katei ka jingkhein, hynrei u saiantis na ka University jong ka Colorado, U Roger Bilham, u ngeit ba katei kan pynmih ia ka jingkhie jumai kaba jur bha, ka ban poi sha ka 8.0 magnitude.
U Kumar, u kam ba ka sorkar India, ka la shim ia ki lad ki lynti ban peit ba ki jylla jong ka thain shatei lam mihngi, kin thaw ia ki kyndon shna iing, ba kin kham pher, na kiwei pat ki bynta jong ka Ri India.
Lah ban pynkynmaw, ba u jumai, uba la khie ha ka por 4.30 mynstep, jong ka Lah Sngi U Blei, ula pyniap ia 8ngut ki briew ha Manipur bad utei u juh u jumai, ula pynkyndit ia kiba bun ki nongshong shnong ha ka nongbah Shillong bad kylleng ka Ri Khasi Jaintia ruh, ha kaba kiba bun ki la ia mih bad kynthih na la ki jingthiah ban phet shabar, na ka bynta ban lait na kano kano ka jingmynsaw na katei ka jingkhie jumai.