Hadien shi taiew ka jingkhlad ka longkmie, dang wan test corona mynta ka sngi ha Shnong Mawbah

Shillong: Ki nongialam shnong jong ka shnong Mawbah, mynta ka sngi ki la pynpaw ia ka jingdiaw mynsiem halor ka jingsuki jong ki briew ka tnad ka koit ka khiah ban leh ia ki test khamtam ia ki briew ki ba dei ki high risk contact bad ki primary contacts jong ki nongpang Covid.

Haba iakren bad ki lad pathai khubor, na ka liang u Secretary jong ka shnong Mawbah u bah Eris Thabah u la iathuh ba ka jingpynslem jong ki briew ka tnad ka koit ka khiah ban pynlong ia ki test ia ki briew ki ba dei ki high risk contact bad ki primary contact jong ki nongpang covid ka buh ia ki nongshong shnong ka shnong Mawbah ha ka jingsyier bad jingeh.

Haba pynshai halor kane ka jingkynnoh, u bah Eris u la iathuh ba ia ki high risk contact jong ka longkmie na Mawbah kaba la khlad na ka jingpang Covid dang dep leh test tang ia kito ki ba la leit ban synran ia ka sha Hospital, hynrei ia kiba don ha ing ki dang wan leh test mynta ka sngi, kata hadien ba la dap shitaiew ka jing khlad jong kane ka longkmie.

U la ong ruh ba na ka liang ki briew ka tnad ka koit ka khiah, ki la wan ban leh ia ki test mynta ka sngi, hynrei ka shimpor haduh shitaiew ban leh ia ki test, halor ba ki dei ki high risk contact jong ka nongpang covid.

U la iathuh ruh ba haba na ka liang ki bor shnong ki phone ia ki briew jong ka tnad ka koit ka khiah ba kin wan leh ia ki test ia ki high risk contact jong kane ka longkmie kaba la khlad na ka jingpang Covid na Mawbah; hynrei na ka liang ki briew ka tnad ka koit ka khiah ki la bthah ia ki bor shnong ka shnong Mawbah ba kin pynbiang ia ki kali bad wan ialam hi ia ki sha jaka test ban phah test ia ki.

U la iathuh ruh ba ha ka sngi ba khlad kane ka longkmie na Mawbah, ym shem la don mano mano na ki bor ba dei peit ban pyntip sha ka shnong ba kane ka longkmie ka khlad na ka jingpang Covid kaba la pynlong ia ki para marjan ba kin leit sngewlem ha kane ka ing; kumta na ka liang ka bor shnong ka la kyrpad ia sorkar ba kan pyntip ia ki shnong tang ia ki briew ba khlad khnang ban phikir ha kaba iadei bad Kane ka khlam.

Na ka liang ki bor shnong ka shnong Mawbah ki la buh ka jingkyrpad na ka sorkar ba kan shimkhia halor kane ka bynta bad ban pyn kloi ia ki jingtest khamtam ia ki High risk contact bad primary contact.