Hadien ki thain Byrnihat, sa ki nongialam shnong Ri Bhoi Sepngi kiba kyrshan tyngeh ia ki 4 seng

Nongpoh: Ha ka sngi kaba ki nongialam jong saw tylli ki kynhun seng ha ka jylla, kiba kynthup ia ka KSU, FKJGP, HNYF bad RBYF, ki la hiar sha Ri Bhoi Sepngi bad pynlong jingialang ha Patharkhmah, na ka bynta ban pan jingkyrshan na ki nongialam shnong ha katei ka thain, halor ka jingdawa ban pyntreikam ia ka ILP bad MRSSA ha ka jylla, ki nongialam shnong na katei ka thain, kiba don ha ka shatri ka Western Ri Bhoi Durbar, ki la ai ka jingkyrshan kaba pura bad kular ban ai ka jingiatreilang bad kitei ki 4 seng.

Lah ruh ban pynkynmaw hangne, dang ha kine ki khyndiat Taiew, kitei ki saw seng ki la pynlong ia kaba kum katei ka jingialang ha Byrnihat bad ha katei ka jinglang jong ki, kaba long kum ka jingpan jingkyrshan na ki nongialam shnong, ki la ioh ia ka jingkyrshan kaba radbah na ki nongialam shnong ka thain Byrnihat.

Ha katei ka jingialang, la iohi ba la jan baroh ki nongialam shnong na ki shnong bapher bapher kiba don ha Ri Bhoi Sepngi, ki la iamih ryntih, na ka bynta ban leit sngap ia ka jingpynshai da kitei ki heh nongialam jong ki 4 seng, halor ki mat jingdawa jong ki, kaba ki la dawa na ka sorkar jylla bad sorkar pdeng, na ka bynta ban pyntreikam ia ka Inner Line Permit (ILP) bad ruh ban pynskhem ne ban pyntreikam pura noh ia ka Meghalaya Residents Safety & Security Act (MRSSA).

Ki nongkren kiba long kum ki nongpynshai sha kitei ki nongialam shnong ka thain Ri Bhoi Sepngi, ki kynthup ia u Samla Donald V. Thabah, General Secretary ka KSU Sengkmie, u Samla Kitboklang Nongphlang, Chief Organizing Secretary ka FKJGP Sengkmie, u Bah L.K Sawkmie, Vice-President ka RBYF, u Bah Marcus Marten, President ka HNYF ha Ri Bhoi lem bad kiwei ki nongialam jong kitei ki saw seng kiba don ha Ri Bhoi.

Na ka jingkren uwei hadien uwei, ki nongialam jong kitei ki saw seng, ki la kynthoh jur ia ka sorkar jylla, khamtam eh ia ka sorkar pdeng, namar ka jingbym lah ban pyntreikam ia ka ILP ha Meghalaya. Ki da pynpaw ruh ba lada kiwei ki jylla kiba don ha Northeast ki lah ban pyntreikam ia ka ILP, kan eh aiu pat lada pyntreikam ha Meghalaya. Kumta halor ka jingmynthi ka sorkar jylla bad sorkar pdeng, kitei ki saw seng ki la byrthen ban leh da kaba kham tyngeh bad katno tam lei, haba ki nongialam shnong bad ki paidbah, ki la sngewthuh halor ka jingdonkam ban don noh ki Ain kiba pyrkhing, kiba lah ban tehlakam halor ka jingwan rung kyrthep ki briew nabar.

Na kaei kaba la iohi ha ka jingialang ha Patharkhmah, la iohi ba ki nongialam shnong na katei ka thain, ki la ai shisha ia kata ka jingkyrshan kaba radbah ia kitei ki 4 seng, namar na ka sur jingkren jong ki nongialam shnong, la iohi shisha ia kata ka mynsiem kaba ki la ai shisha ia kata ka jingkyrshan kaba naduh mynsiem.