Hadien ka UDP, Cong, sei sa ka PDF da u bah Mosjo ban iakhun na Shella

Shillong: Ka People’s Democratic Front (PDF) ka la pynbna ia u bah Mosjo Rockfeller Wanswett kum u kyrtong na ka bynta ban iakhun ia ka elekshon shiteng samoi na Shella kaban long ha ka 21 tarik Risaw ban wan.

Ia ka kyrteng u bah Mosjo la pynbna da ka PDF myn hynnin ka sngi. U bah Mosjo u dei u para jong u bah Leston Wanswett uba la ju iakhun teng na Shella ha ki elekshon ba la dep tangba um ju poi sha ka thong. U Bah Leston u la shah rem ha u Dr Donkupar Roy bam kwai ha Duwar u blei ha ka elekshon 2018 da 370 vote.

Da kane ka jingpynbna ka PDF ia u kyrtong, ka jingdon jong kiba thmu ban iakhun ha kane ka elekshon ka la long 4 ngut, kynthup ka UDP u bah Balajiedkupar Synrem ba la thep kyrteng mynta ka sngi, u bah Batyngshian Laitmon Ryngnga uban iakhun na ka Congress, bad ka Kong Grace M Kharpuri kaba lah ban iakhun kum ka kyrtong shimet.