Hadien ka pynpra Ing mane, sa ka pynpra Ing skul ha Delhi

New Delhi,
13 Rymphang:
Hadien ba la don kumba saw ne san tylli ki jingjia pynpra ia ki ing mane ki kristan ha nong bah Delhi , mynta la sdang bam mih sa ka jingpynpra ia ka ing skul ki kristan ha katei ka nongbah jong ka ri, ha kaba mynta ka sngi ki runar ki bym lah ban tip ki la pynpra ia kawei ka ing skul jong ka Holy Child Auxilium School kaba don ha Vasant Vihar ha South Delhi. Ha katei ka jingjia ki runar ki la pynpra ia ka ophis jong u Principal katei ka skul bad ki la pynpra ruh ia ka CCTV kaba don ha katei ka skul. Na katei ka jingjia la khang noh ia katei ka skul bad la phah ia ki khynnah skul ba kin leit phai noh sha ing.
U myntri rangbah duh ka ri u Narendra Modi marsien ioh jingtip halor katei ka jingjia, hadien katto katne kynta u la khot hajir ia u heh pulit jong ka Delhi u commissioner BS Bassi bad u la pynpaw ka jingsngew khia halor katei ka jingjia kaba nang iai jia shi iai jia ha nongbah Delhi, bad u la hukum ba dei ban tohkit wut wut bad ban kem ia ki runar kiba donkti. U Modi u la ia kren ruh ia u secretary ka tnad pohing u L C Goyal bad u la hukum ia u ba u dei ban peit pyrman bha halor ka jingiai bteng katei ka jingjia pynpra ki jaka kristan ha Delhi. Katei ka jingkhot hajir u Modi ia u heh pulit ka Delhi ka dei tang hadien kynta ba u la ioh ia ka jingpynrem na u nongialam ka AAP u Arvind Kejriwal uba la thoh sha u lyngba ka tweeter, kaba u la ong ba u pynrem jur ia katei ka jingjia bad u la ong ba kum kitei ki jingjia ki dei kiba ym lah ban pdiang.
Ha ka jingkhot hajir ia u heh pulit ka Delhi u Bassi , u myntri rangbah duh u la pynpaw ka jingbym sngewtynnad namar ka jingbym ler ki pulit ka Delhi ban leh eiei watla kiba kum kitei ki jingjia shah thombor ki kristan ki la long la jan shiteng dorjon. U Modi u la ong ba ki pulit kim dei tang ban pyntip ba ki la ioh jingtip ne ithuh ia ki briew kiba leh ia kitei ki kam runar, hynrei ki dei ban kem ruh ia ki.
“ U MRD u la khot hajir ia nga, bad u la bitar namar ki jingjia kiba dang iai bteng ban thombor ia ki ing mane bad ing skul kristan, ngi la iathuh ha u shaphang ki kam ba ngi la leh ha ki case ba la dep, ha ka jingjia ka Vikaspuri lain gut ngi la ioh kem , ha Rohini ka dei ka kam plu na ka jingkem ding, ha Vasant Kunj ka jingtohkit ka dang iaid, ha Dilshad Garden ka tnad SIT ka dang tohkit” ong u Bassi. Utei u heh pulit u la ong ruh ba la pynbun ia ki bor pahara sawdong ia ki ing mane ki kristan bad shen yn buh ia ki bor iada kiba khlain ha baroh ki iing mane.