Hadien ka jingshah khang corona, sa ka jingshah beh na lynti iaid; khie bitar ki nongdie madan, ia ka hukum ka Sorkar

Shillong:”Balei ia ki briew shisngi ne ki Kharmetor kiba la shong beain bad sah beain la slem ha Them Iew Mawlong kim shem la lah ban kyn dang, wat haduh mynta, hynrei, ki shu byrngem ha ki kot khubor, hynrei pyn ban ia ngi ki trai jylla kiba shong kamai jakoph tang i barit ha rud surok ki hukum tang hapoh 10 sngi ban kynriah na ki jaka ba shong die jing die” ong ki nongdie madan kiba shong ha rud surok.

Kane ka jing bthah, ka dei hadien ba ka ophis jong ka Deputy Commisinor East Khasi Hills District, ka la hukum ia ki nongshong die madan bad kiba shong die jing die ha ki lynti iaid kjat, kiba don ha kylleng ki khap sor jong ka nongbah Shillong ban kynriah noh tang hapoh 10 sngi, khnang ban wanrah ia ka jingkylluid ha ka nongbah, baroh kawei.

Na ka liang u nonglum khubor, ula ioh ban ia kren ia ki katto katne ngut ki nongdie madan kynthei, shynrang ne ki samla kiba shong die madan ha ki bynta jong ka Laitumkhrah bad ha ki bynta jong ka 9 lad, ha kaba ki la pynpaw ka jing sngew kyndit ba kyndit kyndit, ban kynriah noh tang hapoh ka 10 sngi bad ki la pynpaw ruh ka jing sngew bitar, ia la ka jong ka jingim, ha kaba ki ong ba ka por, ka la dei ba kin shongkhop noh ha la iing khlem ka jingkamai bad ba kin shu ap beit sa tang ia ka jingiap ba kan shim noh.

Ki nongdie madan, ki la ong “Ngi la shah jynjar baroh ar snem ha u khniang jingpang Corona virus, ngim ioh shuh ka lad ban kamai pynkdang ia ka iing ka sem, mynta ngi la sngewkmen ba ka pyrthei ka la shah biang ban ioh ka jingim kaba kylluid, naduh bym don shuh ki kyndon pyrkhing jong ka khlam, pynban ngi mad jingeh, na ki bor jong ka ain, namar ngi la im bun tylli ki snem, ngi ioh thied ioh siew bai skul khun da ka jing trei shitom, hynrei la ngi ieng ruh jhieh la shong ruh tyngkhuh” ong ki nongdie madan.

Shuh shuh, ki la ong “Ka jingleh jong ki bor ka ain, ka long kaba dei ban pynkylluid jaka ia ka leit ka wan, hynrei ka sorkar kaba khmih ia ka im ka iap jong kiba bun balang, ka dei ban peit bniah ban pynwad ia kano ka jaka kaba i bit ban pynshong ia ngi tangba ngin ia im ha kata ka kamai kajih”.
Ki la bynrap shuh shuh, ba lada ki thmu shisha ban pynkynriah, ha kata ka sngi, kumta ki ba bun kin mih ban pyrshah beit ia kane bad kin shim da kiwei ki lad ban leh, byrngem ki nongshong die madan.