Hadien ka jingpyndep ia ki random test, ha ki ar tylli ki shnong kiba iajan bad ki ktem shipai BSF, ym don kano kano ka Community spread

Shillong: Hadien ba ka sorkar jylla, ka la rai ban pynlong ia ka jingtest naphang ia ki jaka ba iajan bad ka ktem shipai ka ba don ha Umpling na ka liang u Director ka tnad ka koit ka khia u Dr Aman War u la iathuh ba hadien ba la pyndep ia ka jingtest naphang ia ki nongshong shnong ka shnong Umpling kam don kano kano ka Community spread ha kine ki thain.

U Dr War, u la iathuh ba ha ka shnong Umpling la dep ban pyndep ia ka jingtest naphang ia ki 547 ngut ki briew ki ba sah ha ka ne ka shnong Umpling bad myn hynnin ka sngi ladon ki ba test positive da ka jingtest Rapid test Kits ia ki saw ngut ki nongshong shnong ha kane ka shnong hynrei mynta ka sngi hadien ba la dep ban leh ia ka RT-PCR test ia kine ki briew ki long negative. U la iathuh ruh ba ha ka shnong Nongmynsong la dep ban test naphang ia ki 1001 ngut ki briew bad baroh ki long negative, katba ha Mawpat ki briew jong ka tnad ka koit ka khia kin sdang ia ka jingtest naphang bad ka shnong Mawpat ruh kadei ka shnong ka ba donkam ban test ia ki nongshong shnong namar ba kane ka shnong ruh ka dei kaba iajan bad ki shipai BSF.