Hadien ka jing shah kem U bah Joannes Lamare, yn peitngor bha ki pulit ia ka suk ka sain, ong U MR

Shillong: Hadien ka jingshah kem jong u Bah Joannes Lamare ryngkat bad ki laingut ki paralok halor ka jingsuba ba ki don ka jingthmu ban seng ia ka kynhun lehnoh kaba thymmai ha ka jylla da ka jingiarap jong ka NSCN(IM); U Conrad K Sangma u ba dei u Myntri Rangbah jong ka jylla u la ong ba ka dei ka kam ba hap ban shim khia haba don ki kynhun kiba thmu ban seng ia ki kam kaikhlaw ha ka jylla.

Haba kren sha ki lad pathai khubor ha ka 27 tarik u bnai Nailur, u Myntri Rangbah ka jylla u la ong ba ka Sorkar kan pynthikna ba kan pynkhlaiñ ia ka jingpeitngor ban khanglad ia kino kino ki jingjia ne ki jingthmu ban leh ia ki kam pyntriem. Shuh shuh u Conrad K Sangma u la ong ba ka tnad syntiat jong ki pulit ka la trei borbah ban khanglad ia ki kam runar kiba lah ban pyndik ia ka jingshongsuk shongsaiñ hapoh ka jylla bad kaba lyngba ki bor syntiat la lah ban ioh kem ia bun ngut ki briew kiba rah ia ki tiar pynmynsaw ha ki thaiñ Garo Hills.

U Conrad K Sangma u la ai jingiaroh ruh ia ki pulit bad ki tnad syntiat kiba la leh ia ka kamram jong ki ban peitngor bad pyntikna ba lada don kino kino kiba thmu ban leh ia ki kam kiba lah ban ktah ia ka jingshongsuk shongsaiñ kin shah pynshitom beit katkum ka aiñ ha bad u la ong ba donkam shuh shuh ka jingpeitngor ban khanglad ia kino kino ki jingjia kiba lah ban ktah ia ka jylla.

U Myntri Rangbah u la ong ruh ba dei ka jingstad jong ka tnad syntiat ba la ioh ban kem beit ia kiba thmu ban leh ia ki kam pyntriem ha kylleng kylleng ka jylla.