Hadien ka Ilekshon, ngin sa shimkhia halor ka kam RS ha Raid Marwet, ong U CEM

Nongpoh:Haba iadei bad ka jingleit ujor da ki nongialam ka Seng Samla Shnong Byrnihat Area, kiba la leit ban ujor sha District Council, halor ka jingdawa jong ki paidbah Garo, ba ki kwah ban long Rangbah Shnong ha ki shnong Khasi kiba don ha thaiñ Byrnihat bad kiba hap ha Raid Marwet, u Bah Pyniaid Sing Syiem, CEM ka KHADC, u la ong ba halor katei ka mat, na ka liang ka District Council kan sa lum ia ki nongialam shnong ha katei ka thain, nangta ia u Syiem ka Raid Marwet, Hima Mylliem na ka bynta ban iakren ban sngewthuh bha halor katei ka kam.

Kumba ka long mynta, ka dang dei ha ka por kaba baroh ki dang ia bunkam ha kane ka Ilekshon, hynrei haba la kut kane ka Ilekshon, na ka liang ka KHADC ha ryngkat ki briew na ka Hima Mylliem kin sa hiar sha katei ka thain, na ka bynta ban pynbeit bha halor katei ka mat bad ia kaba ym sa peit katkum ki kyndon ain jong ka Hima Mylliem.