Hadien ka dorbar, lah ban khyllem ka shuki CEM KHADC

Shillong, 08 Rymphang:
Ka shuki u CEM u Bah Pynshngain N Syiem ka KHADC ka lah ban khyllem hadien ka dorbar mang tyngka ka Council, ka ban sdang ha ka 20 tarik mynta u bnai.
Ka dorbar mang tyngka jong ka KHADC na ka bynta jong u snem 2017-2018 kan sdang ha ka 20 tarik mynta.
Katkum ka khubor ba la iohlum, la iathuh ba ka Executive Committee (EC) ka People Democratic Forum (PDF) ba ialam da u Bah Pynshngain N Syiem, kan lah ban khyllem noh shen ha kine ki sngi bad ka UDP ka lah ban shimti ban ialam ia ka EC hadien ka dorbar mang tyngka.
“Ka jingkhih ka la don mynta, ngin sa peit sa ia ka por ba ngin ialam ia ka EC namar ba haba don ka lad, mano bym kwah ban synshar”, la ong uwei u nongialam ka UDP.
Ka jingsngew skhem ka UDP ban ioh synshar ha KHADC ka long hadien ba u MDC ba phet na Congress u Bah Albinus Lyngdoh u la wan ban iasoh bad dang don shuh sa kiwei ruh ki MDC, tangba ka UDP kam pat kwah ban pynpaw kyrteng.
Lada ka long kaba shisha, la sngewthuh ba ka UDA (United Democratic Alliance) ka kynhun synrop jong ki MDC shimet ha KHADC, kan sa lko pum ha kine ki khyndiat sngi.
Ia mynta ka UDP ka dang bunkam ban iakren ia pynbeit bad ki MDC shimet ban ioh ia ka jingbun paid namar ba na ka liang ki MDC ka Conggress ki la kyrshan lypa ban ialamka UDP ia ka EC tang ban ioh pynkhyllem ia u Bah Pynshngain, uba la shah sospon ha ka party lai snem.
La iathuh ba la don ki MDC kiba ai ia ka jubab ban ai ka jingkyrshan ia ka UDP, ha kaba u Bah HS Shylla u MDC ka UDP na Nongkrem, u lah ban shimti ia ka kam CEM lane u Bah Teinwel DKhar.
Ka UDP ka don 6 ngut ki MDC da ka jingwan iasoh u Bah Albinus ha ka iing kaba 30 ngut ha KHADC. Ka Congress ruh ka la kular ban kyrshan iaka EC ban ialam da ka UDP.
Ka seng Congress ka la ialeh katba lah ban wad kilad ki lynti kumno ban pynkhynniuh ia ka Executive Committee jong u bah PN Syiem, da kaba khroh ia ki MDC jong ka UDP ba kin ia treilang ha KHADC.
Ki thymmei khubor ki iathuh ruh ba ka seng Congress ka dang iai pyrshang ban ia kren bad ki MDC jong ka seng UDP ym bad ki nongialam jong ka UDP, namar ha poh District Council ka tip shai ba kam don kata ka ain kyntiap seng.
Ka jingpynslem jong u bah PN Syiem ban thung sa ia ki ar tylli ki shuki EM kiba dang lait hapoh jong ka EC kala wanrah ruh ia ka jingeh hapoh jong ka UDP kaba don bun ki MDC hapoh ka iing dorbar kaba 29 ngut.