Shillong:Myn hynnin ka sngi, na ka liang ki nongtrei ka GVK-EMRI 108 kiba don hapoh ka lama jong ka Megha laya EMRI Worker Union (MEMRIWU), ki la leit ban ia kynduh ia u myntri ka tnad ka koit ka khia ka jylla u James P K Sangma bad kane ka long hadien hynniew sngi, ba ki la pynlong ia ka jingsangeh trei kam ban dawa ba ka sorkar ka dei ban pynioh ia ka jingdawa jong ki.
Haba ia kren bad ki lad pathai khubor hadien ka jingiakynduh bad u myntri ka tnad ka koit ka khiah, ka President jong ka MEMRIWU ka kong Microlina Syiemlieh, ka iathuh ha ki lad pathai khubor ba u myntri u la ai ka jingkular ba ka sorkar kan ym bteng shuh ia ka jingiateh bad ka company GVK hadien ka 31tarik u Lber 2022.
Haba ia dei bad ki nongtrei na ka liang u myntri la ong ba ka sorkar kan ym weng kam, hynrei kin neh ha ka kam namar ki la dei kiba la don lypa ha ka kam, kumno ban pyniaid pat ia kane ka EMRI ne kito ki kali 108 ka sorkar ka dang peit bniah bad ka jingkular ka long ba kan nym don ka jingbeh kam.
Ka la iathuh ruh ba u myntri u la kular ba ia ki jingiakren mynta ka sngi ka tnad ka koit ka khiah kan ai da ka jingthoh mynta ka sngi hi bad na ka liang jong ka sorkar kam kwah ban iohi ba kane ka jingshakri ia ki paidbah lyngba kane ka 108 kan ktah kumba ka long mynta.
Ka kong Microlina ka la ong, haba ia dei bad ka jingiakhih ki nongtrei kin sa shim ia ka rai ban weng ne bteng kan long hadien ba ki la ioh ia ka jingthoh na ka tnad ka koit ka khiah, mynta ka sngi, lada ka jingthoh ka long kumba la ia kren kin sa weng noh ia ka jingiakhih.
Haba ia dei bad ka tulop ka la iathuh ba ka sorkar kala phah ia ka pisa sha ka GVK bad kane ka Company kan sa pyllait ha ba kut jong mynta u bnai.
Na ka liang ki ne ki nongtrei ka EMRI 108 mynta ka janmiet ki la wan ruh ban ia kynduh ia u myntri rangbah ka jylla u Conrad K Sangma, ha kaba na ka liang u myntri rangbah u la kular ba un bishar bnaih bad un sa shim rai halor ka ne jingdawa jong ki, ynda u la ioh ia ka kaiphot ba pura na ka liang ka tnad.
Phi don ban ong eiei?