Hadien ka 14tarik, sa kaei kaba ap ia u paidlang ka India?

Bah Monarch Shabong

Ki dak ki shin, ki kdew ba ka jingkhang shnong, kan lah ban dang iai bteng ha India, wat hadien ka 14tarik mynta u bnai bad ka daw, ka long namar ba ka jingpang Covid 19, ka nang iai kiew na ka sngi sha ka sngi ha kylleng ka Ri.

Hynrei halor kane ka phang, ka sorkar India, kam lah satia ban shim ia ka rai marwei bad ka dei ban pan jingmut na ka jingsngew jong ki sorkar Jylla la ki sngew iahap ne em ban dang iai bteng ia ka jingkhang shnong.
Ka sorkar Meghalaya, ka la dep rai ban plie noh ia ki iew ki hat, ki ophis naduh ka 15tarik Iaiong bad katei ka dei ka rai kaba kongsan bha, na ka byntau paidlang jong ka Jylla, hynrei ka sorkar Jylla, ka kren shai ruh kan dang khang ia ka rung ka mih jong ki briew kiba nabar bad katei ruh ka long ka mat kaba don jingshisha.

Haduh mynta, ngi dei ban khang ia ka jing ia rung ia mih na kawei ka jylla sha kawei pat, katba ka trei ka ktah hapoh ki Jylla, ka shong ha ka jingsngew thuh da ki Jylla bapher bad kumno ba kin pyniaid ban ialeh pyrshah ia kane ka jingpang khlam.

Ka nuksa kaba shai, ka long ba ka Meghalaya, kam don corona, katba ka Assam, ka la jyllei da kitei ki nongpang bad nangta ka Mizoram, ka Manipur bad kumta ka leit ka wan hapdeng ka Meghalaya bad kitei ki jylla, ka dei ban khang sbak, hynrei ia ka trei ka ktah bad ka shong ka sah jong kito kiba don hapoh ka Jylla, ka dei ban iaid kumba ju long baroh shi katta.
Haba peit ia kane ka khlam, la iohi ba ka sar tyngeh ha ka Jylla Maharashtra, Tamil Nadu, Uttar Pradesh, Delhi, Kerala nalor kiwei pat ki Jylla bad kitei ki dei ki hot spot, kumba ka ong ka sorkar India bad ia kitei dei ban khang hi sbak bad kitei ki briew, kim dei ban shang shnong ia mynta bad nangta kiwei pat kiba na kiwei ki jylla, kim bit ban ia rung ia mih.
Ka sorkar India, ka thangiong ngain ha kine ki sngi, hynrei ka dei pat ka bynta jong ka sorkar, ba kan pyrkhat ia ka iap ka im jong ki billion ngut ki nong India bad ka la dei ka por, ba kan pynkhlain ia ka jingtrei kam jong ka tnat sam bam jong ka India, lem bad ki jylla bad nangta sa ka jing trei kam jong ki Bank bad kata ka long ba ki paidbah kin pahuh ka pisa bad ba kin lah ban rung ban mih na kawei ka shnong sha kawei pat ban ia trei ia ktah, ia kamai kajih ban pynbiang ia ka jing donkam ka kpoh.