HADIEN KA 1000 SNEM

AIS SUJA

Ngi la dep ban pule ia ka 1000 snem (millennium). Mynta ngin peit ia ki jingjia kiba hadien kata ka 1000 snem pat.

Ka ktien u Blei ka ong – “Te ynda la pyndep ia kata ka 1000 snem, yn pyllait noh ia u soitan na ka byndi jong u (yn pyllait shipor) bad un leit shukor ia ki kynja bynriew kiba ha sawdong pyrthei….. ka jingkhein jong ki kat u shyiap ka duriaw, bad ki la leit kiew halor ka pynkiang ka khyndew, ki la ker tawiar ia ka jaka shong dara kita ki Riewkhuid (kiba la mihpat bad kiba shah rongnoh) bad ia kata ka Nongbah Jerusalem. Te ka ding ka la wan hiar na u Blei na bneng bad ka la bam duh ia ki. (kane kamut ia kito ki ba dang im kat haduh kata ka por ia kiba ym shym la rongnoh, kiba pdiang ia u 666 kein). Te ia uta u soitan uba shukor ia ki yn bret kein sha kata ka ka pung ka ding bad u kyndok ha kaba don ruh uta u Mrad khlaw bad u Nongiathuhlypa Balamler. Hangta yn pynkordit ia ki mynsngi bad mynmiet sha ki bymjukut bymjukut. Jingpynpaw 20:7-10.

Mar ia kut ka 1000 snem. Kan don ka jingmihpat KABA AR (second Re-surrection) kaba dei ka jingmihpat kaba sha ka jinglehrain bad jingjah burom ba bymjukut. Daniel 12:2. Kiba mihpat ha ka jingmihpat kaba Ar, ka long ka jingmihpat kaba khlem ka jingkyrmen shuh, kiba leh bymman kin iamih pat sha ka jingmih pat ka jingpynrem. Ioanis 5:29. Namar ka ktien u Blei ka ong – “U ba suk bad u ba khuid long uta u ba don bynta ha kata ka JINGMIHPAT KABA NYNGKONG.” Jingpynpaw 20:6. Te mynta ka jingmihpat kaba Ar, ka long ka jingmihpat sha ka jingpynrem, bad jingjah burom bymjukut. “Nga la iohi ia kiba la iap kiba rit bad kiba khraw ki da ieng ha khmat ka khet bad la plie ia ka kitab ka JINGIM: la bishar ia kita kiba iap na kita kiei kiei ia kiba la thoh ha kata ka kitab kat kum ki jingleh jong ki. Te ka duriaw ka la aiti ia kiba iap ka jingiap bad ka Hades ki la aiti ia kiba iap te la bishar ia uwei pa kawei kat kum ka jingleh jong ki. Te ia ka Jingiap bad ka Hades la bret sha ka pung ka ding. Kane ka long kata ka jingiap kaba Ar ha ka pung ka ding kein (iap met bad mynsiem). Te jar ia uba ym shym la shem ba la thoh, ia ka kyrteng jong u ha ka KITAB KA JINGIM, yn bret ia ki sha ka pung ka Ding. Jingpynpaw 20:11-15.

Haba la bret kumta ia u soitan bad ki ksuid bad ia ki riew bymman dei hangta kein ba ia ka Jingiap ruh la pynduh noh la bret lang ia KA JINGIAP BAD KA HADES sha ka pung ka ding. Jingpynpaw 20:14. Ka ktien U Blei ka ong – “yn da kumta, long kaba kut ynda u Jisu un aiti ia ka HIMA ha u Blei uba u Kpa, haba u la pyndep noh ia ka jingsynshar bad ia ka jingdon baroh bad ia ka Bor baroh namar u synshar haduh ba un da pyndem ia ki nongshun jong u baroh hapoh ki kjat jong u. ka nongshun ba khadduh dei ka JINGIAP. 1 korinth 15:24-26. Mynta long kaba kut, THE END jong kiei kiei kiba ha ka pyrthei haba u Jisu ula bret iaka JINGIAP SHA KA PUNG KA DING. Jingpynpaw 20:14. Kumta, haba u Jisu un aiti noh ia kiei kiei ha u kpa (Blei), u Jisu un ialam noh ia ki Riewkhuid sha kata ka Bymjukut ka lawei (Bneng) (Eternity Future). Dei hangta kein – kin sa iohi ia kiei kiei ruh kiba ka khmat doh kam pat ju iohi bym pat ju mih ruh ha ka dohnud u briew ki dei kita kein kiei kiei ia kiba u Blei (Kpa) u la buh lypa IA KITA KIBA IEIT IA U. 1 Korinth 2:9.

Namar kata, ka ktien u Blei ka khot sngewbha ia ki briew baroh mynta ban wan sha u Blei ban iasuk noh bad u Blei u kpa katba ka por kam pat dier ia ka jingim, namar ka jingim briew kam long kaba Tikna hangne ha Pyrthei. Ka ktien u Blei ka ong – “To LONG PHI KIBA LA PYNIASUK BAD U BLEI.” 2 korinth 5:20. Dei hangne kein long kata kaba kut, haba u Blei un thang noh ia kane ka pyrthei (earth) da ka ding…… kita ki bneng (heavens) kin leit noh burr, ki jor tynrai (atoms) da kaba thangrhem kin um noh, bad ia ka khyndew bad ia kita ki jingleh ba don haka YN THANG DUH. Heavens shall pass away with a great noise, and the elements shall melt with fervent heat, the earth and the works that are therein shall be BURN UP. 2 Petros 3:10. Amen.