Nongpoh: Ki san ngut kiba la shitom jur na kaba bamja bad u tit Khlaw na ka dong Nongkyndang hapoh ka shnong Saiden, arngut na kitei ki san ngut ki la khlad noh bad sa lai ngut ki dang don mynta hapdeng ka jingshah sumar ha Bethany Hospital Nongpoh.
Lah ruh ban kdew hangne, ba ha ka miet 2 tarik mynta u Bnai, kitei ki shi iing, ki la iabam ja miet bad u Tit, hynrei tang katto katne por ba ki la bam ia utei u Tit, ki la kem pang bad shitom, ia kaba la rah noh mar mar ia kitei kiba la shitom sha ki jaka sumar ha Nongpoh.
Hapdeng ka jingshah sumar, nyngkong iwei u khyllung ba dang 3 snem ka rta, kata iba dei i khun ksiew jong ka Kong Larita Syiemlieh, i la khlad noh bad hadien ka jingkhlad jong itei i khyllung, sa mynta ka sngi ka Kong Larita Syiemlieh, ka la khlad noh la sla pyrthei bad kumba ka long mynta sa lai ngut ki khun jong ka Kong Larita Syiemlieh, ki dang don hapdeng ka jingshah sumar.
Kitei kiba la shitom na kaba bam ia u Tit Khlaw, ki dang don mynta hapdeng ka jingshah sumar ha Civil Hospital Nongpoh bad ha Bethany Hospital Nongpoh, ha kaba ia kiba la kham shitom jur ki don hapdeng ka jingshah sumar ha Bethany Hospital bad ia kiba don hapdeng ka jingshitom kaba malu mala, ki don hapdeng ka jingshah sumar ha Nongpoh Civil Hospital.
Na kitei ki san ngut kiba la shitom jur na kaba bam Tit, 2 ngut ki don hapdeng ka jingshah sumar ha Bethany Hospital Nongpoh, katba kitei kiba shitom malu mala, ki don hapdeng ka jingshah sumar ha Nongpoh Civil Hospital.
Ka jingtip kaba la iohlum, la ong ba katei ka jingshitom ba kynsan jong kitei ki san ngut, ka dei hadien ba ki la dep ban bam ja miet hynnin ka miet 2 tarik u jylliew, ha kaba la ong ba hadien ba ki la dep ban bamja ha ryngkat u Tit ki la kem shitom bad kaba la hap ban rah mar mar sha ki jaka sumar.
Nga sngew ban ong bad pynkynmaw, lah bun ngut ki mynsiem briew kiba lah duh ei bad iap naka jingbam iaki tit khlaw bad wat ki jait tit kiba la jubam ruh kumjuh. Hato naka liang ka sorkar bad naka liang ka tnad ka koit-ka khiah ka ladei ban exsamin bad ai ka awareness iaki paidbah shaphang ka jingbam iaki tit bapher-bapher lada don ka lad.