Shillong 24 Rymphang: U Chief Executive Members barim ka Khasi Hills Autonomous District Council (KHADC) u bah pyniaid sing Syiem hadien ba u la shah rem noh ha kane ka ilekshon MDC sha KHADC ha u kyrtong la VPP u bah Winston Tony Lyngdoh, u la ai ka jingkhublei ia ki paidbah baroh ki ba la ai shisha ka jingkyrshan, watla u khlem poi sha kathong.
Ha ba ai jingkren sha ki paidbah ha iingsah jong u ka ba don ha Nongthymmai mynta ka sngi nyngkong ka 24 tarik Rymphang 2025 u la ong, ba ki paidbah ka Nongthymmai ki la ai ka jingkyrshan shisha ia u, ha ka ba u la ioh 6hajar tam eiei ka vote, wat lada ki nongialam jong u bad ma u ki la wan ban pyntip tang ar bnai hynrei ki paidbah ki ai shisha ka jingkyrshan bad ki don ka jingshaniah.
U bah Pyniaid u la ong, ba kane ka jingkyrshan ki paidbah ia u, ka pyni, ba ki thrang shisha ia ka jingtreikam ka seng, hynrei namar ba ngim ioh ban iakynduh bad ki longing longsem bad ia ki nongshong shnong ban pynsngewthuh ia ka nongrim ba ka party ka don, lehse ngim poi sha kathong.
Watla u bah pyniaid u la shah rem noh, hynrei u la ai khublei pat ia u kyrtong ka VPP u bah Winston Tony Lyngdoh uba lajop ha kane ka ilekshon, u ba long ruh u MDC ba thymmai ka KHADC.
U la ong ruh, ba Kaei kaei baroh kadei ka jingpyniaid u ba najrong bad u hap ban pdiang iakata, nalor kata u la ai ka jingkhublei sua baroh ki nongialam ki ba la iatreishitom bad peit miet peot iong, ban ia kyrshan lem ia u ha kine ki sngi ba ladep.
U la pynpaw ruh ka jingsngewkmen, ba ha i por i ba lyngkot eh ba ngi la ioh ban trei katne ka vote ba ngi la ioh hapdeng ka jingshah pynsngewthuh bakla shah pynthame, halor ki ba bun kimad ha ba iadei bad kiwei kiwei kikam ki ba pyrshang ban ialam bakla, hynrei watla karta ruh, ka vote ngi la ioh haduh kattne.
Kum ban shu kdew hangne, ba u bah Pyniaid sing Syiem u dei u CEM ka KHADC bad u MDC na Sohryngkham konstitwensi u ba lajop haduh ar sien, hynrei mynta ka kynti pat u la iakhun noh na Nongthymmai konstitwensi ha kaba u la shah rem noh.
Phi don ban ong eiei?