Hadien ba leit duwai ha u Pastor Lawbyrwa, wan duwai u Phadar ha iing; sangeh ka jinghap maw ha ka iing ha Umtrew

Nongpoh: Ki briew kiba shong ha kawei ka iing kaba don hapoh ka Shnong Umtrew ha Ri Bhoi District, ki la lait noh na ka jingshah pyndik na ka jingwan hap ki Maw, Piat bad kiwei ki tiar, kata ka long hadien ba kitei ki briew kiba shong ha katei ka jaka, ki la ban shah duwai ha u Pastor ha Lawbyrwa, nangta ba la wan duwai u Phadar ha iing bad ruh hadien ba ki la kynriah noh na katei ka jaka kaba ki ju shong.

Kum ban shu pynkynmaw hangne, ba katei ka jingjia ba phylla na ka jinghap ki Maw, ki phan bad kiwei ki tiar, ka la sdang mynha ka miet 17 tarik mynta u bnai bad kaba la neh kumba saw ne san sngi ei ei, hynrei katei ka jingjia ba phylla ka la sangeh noh tad haduh kitei ki trai iing, ki la shah duwai ha u Pastor, Phadar bad kynriah noh na katei ka jaka kaba la jia katei ka jingjia ba phylla.

Lah ruh ban kdew, ba na katei ka jingjia ba phylla ha katei ka longiing, ka la pynshaiong hi ngain ia ki briew ym tang na ka shnong Umtrei, hynrei ia ki briew kiba nabar ruh kumjuh bad katno tam ia kito ki briew, kiba la leit ban peit hi da la ki jong ki khmat sha katei ka jaka, ha kaba ki la sakhi ia ka jingjia ba shisha halor ka jinghap ki Maw, ki phan ha katei ka iing.

Kan da long ruh kaba sngewphylla, namar ha katei ka jinghap Maw, phan kam shem la wanrah ia kino kino ki jingjia ba sngewsih ne mynsaw, hynrei ka la shu pynkyndit tang ia ki briew kiba don ha katei ka jaka, namar kim shem la iohi mano ba kawang ia kitei ki Maw bad khamtam eh ia u Phan, uba dei u phan na katei hi ka iing, pynban u la shu hap na jrong iing, da kaba sam lyngba ia ka tin ha ka dur ba kawang ki briew, hynrei ki tin sopiing ha katei ka iing pat kim lei lei.

Katei ka longiing ka dei ka iing jong ka Kong Loncy Jyrwa, kaba na ka Balang Catholic bad kaba dei ka nongsahwai ha katei ka iing, hynrei mynta ki la shongsuk shongsain bad ym don shuh katei ka jingshah pyndik, kata hadien ba ki la dep ban shah leit duwai ha u Pastor ha Lawbyrwa, nangta wan pyn Duwai u Phadar ha iing bad ruh ba ki la kynriah noh na katei ka jaka, ba la jia katei ka jingjia kaba phylla.