Hadien ba la sangeh namar ka jingshit ka suin bneng, 9 haduh 11 mynta u bnai yn sdang ka DLISAM ha Madan Pahamsyiem

Nongpoh, 07 Jymmang: U District Sports Officer ka Ri Bhoi District, u Bah Bobby L Nongbet, u la pyntip paidbah ba ka lympung ialehkai Sports jong ki skul ha Ri Bhoi, kaba la tip kum ka District Level Inter School Athletic Meet 2024, kan sa sdang ha ka 9 haduh 11 tarik mynta u bnai ha NSCA Mini Stadium in Pahamsyiem, Nongpoh.

Lah ruh ban kdew hangne, ba ka District Level Inter School Athletic Meet 2024, ka la dei ban long ha ka 1 haduh 3 tarik mynta u Bnai, hynrei namar ka jingshit palat bad rang tyrkhong ka suin bneng, la hap ban pynsangeh noh shipor.

Haba iadei bad katei ka jingsdang biang ia katei ka lympung ialehkai sports ki skul ha Ri Bhoi, na ka liang u Bah Bobby L. Nongbet, u la kyntu ia kito ki skul kiba la dei ban iashimbynta ba kin wan iashimbynta ha kajuh katei ka jaka, ha kitei ki tarik ba katei ka lympung kan sdang.