Nongpoh, 22 Lber: Kawei ka longkmie na ka shnong Mawpun Kshaid, kaba la tip kum ka Kong Aidaris Marbanniang bad kaba dei ruh ka nongsumar Khasi, mynta ka sngi ka la ioh ban plie ia la ka jong ka jaka ban ai jingsumar, ia kaba ka la buh ha shnong Mawpun Kshaid.
Ia katei ka jaka ai jingsumar jong katei ka longkmie, la plie paidbah paidbah da u Bah Bandary Ryntathiang, Rangbah shnong ka Mawpun Kshaid, ha ryngkat ka jingdon ki nongialam shnong lem bad ki riew rangbah ka shnong Mawpun Kshaid.
Katei ka longkmie, ka dei kaba la sdang ban ai jingsumar ia kiba pang ba shitom naduh ka por ba ka dang khhynnah, namar ka la hiar pateng na ka kmie jong ka, kaba long ka nongsumar Khasi ha ki por ba mynshwa, ha kaba ka la lah ban sumar ia kiba pang BP, jingpang iap shiliang, kiba laitdoh lait thied, ki longkmie bym ioh khun, ha kaba ka la pyndonkam da ki dawai kymbat bad da kaba khem ban pynjem ia ka jingpang jingshitom.
Ka la ong ruh, ba ka la plie khnang ia katei ka jaka ai jingsumar Khasi ha katei ka jaka kaba don harud surok Shillong by-pass ha shnong Mawpun Kshaid, ka long ban pynsuk ia ki briew kiba ju wan sha sumar ha ka, namar ka iing jong katei ka longkmie, ka don kham pajih na surok bah.
Katba na ka liang u Bah Bandary Ryntathiang, kum u Rangbah shnong, u la ong ba katei ka longkmie, ka dei kaba la lah ban pynkoit ia kiba bun ngut ki briew kiba leit ban shah sumar ha katei ka longkmie.
Phi don ban ong eiei?